Təqdimat

Sırağagün Azərbaycan Yazıçılar Birliyinin Natəvan klubunda dramaturq və yazıçı, fəlsəfə elmləri doktoru Firuz Mustafanın "13 hekayə" və "Dəniz köçü" kitablarının təqdimat mərasimi keçirilmişdir. Yığıncağı Azərbaycan Yazıçılar Birliyinin katibi Arif Əmrahoğlu açmışdır.

Tədbirdə filologiya elmləri doktoru Bədirxan Əhmədov, millət vəkili Nazim Məmmədli, yazıçının qələm dostları İlyas Tapdıq, Nahid Hacızadə, Musa Ələkbərli, Ələddin Əsədov, Ağalar İdrisoğlu, Aydın İbrahim, Abuzər Bağır, Dayandur Sevgin, Oqtay Rza, tənqidçilərdən Bəsti Əlibəyli, Hicran Hüseynova, mədəniyyətşünas Məleykə Əliqızı, əməkdar artist Hicran Nəsirova, “Zirvə” ziyalılar təşkilatının sədri Minayə Munis və başqaları çıxış edərək Firuz Mustafanın dramaturgiyasından, onların səhnə təcəssümündən söhbət açmış, onun yazılarının özünəməxsusluğunu qeyd etmişlər. Çıxışçılar onu hekayə və pritça müəllifi kimi də dəyərləndirmişlər. Qeyd etmişlər ki, çox məhsuldar işləyən Firuz Mustafa yaradıcılığa başladığı ilk illərdə şair və jurnalist kimi tanınmışdı. Lakin sonrakı illər o, ədəbi növün digər sahələrində də qələmini sınadı. Dram əsərləri ilə yanaşı romanları, povestləri, hekayələri də diqqəti çəkdi. Eyni zamanda, onun fəlsəfi esseləri maraqla qarşılanır.

Çıxışçılar 20-dən çox kitabın müəllifinin "Teatr meydanı", "Qara qutu", "Yaltaqlar qurultayı”, "Tabut" və s. bədii əsərlərindən söhbət açdılar, "Dəniz köçü" kitabının bədii məziyyətlərini qeyd etdilər.

Məclisin sonunda çıxış edən Firuz Mustafa tədbirə toplaşanlara təşəkkürünü bildirməklə yanaşı, həyat və sənət haqqında düşüncələrini də bildirdi.

Ədəbiyyat qəzeti.-2009.-15 may.-S.5.