Fuzuli - 515

Əbədiyyət yolu

“Dahi Azərbaycan şairi, böyük mütəfəkkir insan Məhəmməd Füzulinin 500 illik yubileyi ilə əlaqədar təşkil olunmuş komissiyanın iclası keçirilir. Xeyli vaxtdır ki, respublikada bu yubileyə hazırlıq işləri gedir. Yubiley komissiyasının yaratdığı işçi qrup da müəyyən işlər görmüşdür. Ancaq komissiya üzvlərinin və dəvət olunmuş şəxslərin iştirakı ilə geniş iclas keçirilməsinə böyük ehtiyac vardır. İndiyədək görülmüş işləri təhlil etmək və qarşıdakı tədbirləri müzakirə etmək, bunların həyata keçirilməsi üçün şərait yaratmaq komissiyanın əsas vəzifələridir.”

On beş il bundan əvvəl - 1994-cü il avqustun 1-də ulu öndər Heydər Əliyev M.Füzulinin 500 illik yubileyi üzrə Dövlət komissiyasının iclasını bu sözlərlə açdı.

O, eyni zamanda qeyd etdi ki, respublikamızın bu ağır dövründə böyük yubileylər keçirilməsi, şübhəsiz ki, müəyyən qədər çətinliklərlə üzləşəcək. Ancaq bunlara baxmayaraq, həyatımızın mənəvi-mədəni sahəsi heç vaxt unudulmamalıdır. Çətinliklər nə qədər çox olsa da, mədəniyyətə, mədəni irsimizə, mənəviyyata daim xüsusi diqqət yetirməli və bu sahələrin geri qalmasına yol verməməliyik.

Dahi Füzulinin 500 illik yubileyinin keçirilməsi böyük mütəfəkkir şairin Azərbaycan xalqı qarşısında və bütün türk xalqları, dünya mədəniyyəti qarşısındakı xidmətlərinə verilən qiymətdir. Eyni zamanda həm də mədəniyyətimizi, tariximizi təbliğ etmək üçün çox əlverişli fürsətdir və biz bundan hərtərəfli istifadə etməliyik. Uzun illərin təcrübəsi göstərir ki, belə tədbirlər mənəviyyatın yüksəldilməsinə, insanların tariximizlə bağlı olmasına kömək göstərir.

Ümummilli liderin qədim və zəngin tarixə malik ədəbiyyatımıza, mədəniyyətimizə, elmi-bədii-yaradıcı fikrimizin dünyaşöhrətli siması Füzuliyə verdiyi yüksək qiymət dahi şairin dünyaya gəldiyi və yaşayıb-yaratdığı İraqda keçirilən unudulmaz yubiley günlərində bir daha əyani şəkildə təsdiqini tapdı.

On beş payız bundan əvvəl Heydər Əlirza oğlu Əliyevin özünə xas qeyri-adi təşkilatçılıq qüdrətilə Füzulinin 500 illiyi respublikamızın elm və sənət adamlarının böyük bir qrupunun iştirakı ilə İraqda həqiqətən möhtəşəm qeyd olundu.

Kərkükdə keçirilən tədbirdə qardaş türkmanların Azərbaycandan gələn doğmalarına müraciətlə Füzulinin bu məşhur beytini necə təsirlənmiş halda dediklərini unutmaq çətindir:

Bu vüsalə yuxu əhvalı demək mümkün idi,

Əgər olsaydı yuxu dideyi-giryanimizə.

(Bu görüşə yuxu əhvalı demək olardı,

Əgər ağlar gözümüzə yuxu gəlmiş olsaydı.)

Bu yuxu güman edilən mənzərəni həqiqət edən idi - ulu öndərin nadir şəxsiyyəti, böyük dövlətçilik istedadı idi.

İraqdakı yubiley günlərində fəxrlə deyilən həqiqətlərdən biri də belə bir fikir idi: füzuli Azərbaycanın İraqdakı daimi səfiridir.

Hazırki geniş qloballaşma prosesində İslam ölkələri müasir dövrün tələblərinə layiqincə cavab vermələri üçün, müştərək yaşarı milli-mənəvi dəyərləri qoruyub-saxlamalı, dünyanın digər xalqlarının gərəkli keyfiyyətlərini lazımınca öyrənməlidir.

Bu il oktyabrın 14-də Azərbaycan Prezidenti İlham Əliyev “Bakı - İslam Mədəniyyətinin Paytaxtı - 2009” mədəniyyət ili çərçivəsində Bakıda keçirilən İslam Komitəsi Təşkilatının üzvü olan dövlətlərin Mədəniyyət Nazirlərinin VI Konfransının nümayəndələrini qəbul mərasimindəki çıxışında demişdir: “Azərbaycanın çox zəngin tarixi, çox zəngin mədəniyyəti vardır... Azərbaycanda mədəniyyət sahəsində çox böyük işlər görülür... Azərbaycan xalqı indi öz taleyini özü həll edir. Bu, bizim üçün tarixi əhəmiyyətdir. Biz bu gün dünya birliyində öz müstəqil siyasətimizi aparırıq. Bizim üçün dost, qardaş ölkələrlə qarşılıqlı surətdə faydalı əlaqələr qururuq və biz görürük beynəlxalq təşkilatlarda kimlər bizi dəstəkləyir. Bu, çox önəmlidir. Əlbəttə, biz çalışırıq ki, bütün ölkələrlə yaxşı münasibətlər quraq və buna nail oluruq. Ancaq ölkəmiz üçün həlledici məqamlarda bizim yanımızda olan ölkələr müsəlman ölkələri olmuşdur. Beynəlxalq təşkilatlarda bizə ən çox dəstək verən ölkələr müsəlman ölkələridir. Biz də öz növbəmizdə, bütün beynəlxalq təşkilatlarda həmişə müsəlman ölkələrinin təşəbbüslərini dəstəkləyirik.”

Bu həqiqət də bir daha təsdiq edir ki, Füzuli İraqda cismən əbədi uyusa da, xüsusən bütün müsəlman dünyasında Azərbaycanın ən mötəbər və daimi səfiridir. Hər gələn yeni il onun yaşı üstə yaş gətirir. Bu rəqəm indi 515-dir... Füzulinin əbədiyyət yolu bitib-tükənməzdir.

Ədəbiyyat qəzeti.-2009.-20 noyabr.-S.1.