Qobustan"ın payız sayı

İldə 4-dəfə işıq üzü görən "Qobustan" sənət toplusunun 3-cü sayı çapdan çıxmışdır. Toplunun bu sayı görkəmli rəssam Səttar Bəhlulzadənin 100 illiyinə həsr olunmuş yazılarla açılır. Sənətşünas Ziyadxan Əliyevin görkəmli sənətkara həsr etdiyi məqalə "Süslənmiş rənglərin poetikası" adlanır. Nəzakət Azərinin "S.Bəhlulzadənin xeyir-dua verdiyi rəssam", Mehriban Novruzovanın "Azərbaycan rəssamlığında qadın obrazı", Zahid Sarıtorpağın "Rənglərin zamansızlıq çalarları", Təranə Əliyevanın "Qanun musiqi aləti miniatürlərdə" adlı qeydlərində təsviri sənətimizin müxtəlif məsələlərindən söhbət açılır. Bu sayda musiqi sahəsinə daha geniş yer ayrılıb. AMEA-nın müxbir üzvü Zemfira Səfərovanın "Fətullah Şirvani" və onun "Musiqi məsələsi risaləsi", S.Ələkbərin "Sarvan və karvan", respublikanın əməkdar müəllimi Gövhər Hüseynovanın "Mənalı alim ömrü", sənətşünaslıq namizədi Arzu Quliyevanın "Fikrət Əmirovun simfonik muğamları", professor İmruz Əfəndiyevanın "Sevdiyim bəstəkar və gözəl insan haqqında düşüncələr", yazıçı-publisist Mustafa Çəmənlinin "İlk Azərbaycan rəqs ansamblı”, Reza Cudi Cabbarinin "Bakı Musiqi Akademiyasının vokal ifaçılıq pedaqoji tarixinə bir nəzər", sənətşünaslıq namizədləri Ağahüseyn Anatolluoğlunun "Muğam elmi məqalələrdə", Abbasqulu Nəcəfzadənin "Müsəlləs çalğı aləti", şair Oqtay Rzanın "Bir Manaf dayı vardı" adlı araşdırma və məqalələrində görkəmli bəstəkarlarımız haqqında söhbət açılır, musiqi və rəqs sənətimiz tədqiq və təbliğ olunur. Məryəm Əlizadənin "Sən haralısan, zavallı Timon", Könül Əliyevanın "Çağdaş Azərbaycan teatrının dünya teatr prosesinə inteqrasiyası və avanqard teatr prinsipləri", Gülnarə Kərimovanın "Namiq Kamal və Azərbaycan teatrı", Ələkbər Qasımovun "Gürcü dramaturgiyası Naxçıvan teatrında", Dəniz Əhmədovanın "Hüseyn Cavid irsinin qorunması və təbliğində xatirə ev muzeylərinin rolu", Kamil Əfsəroğlunun "Bir filmin tarixçəsi", Vəfa Mühacirovanın "Klassik rus dramaturgiyası Sumqayıt teatrı səhnəsində" adlı yazıları da toplunun bu sayında təqdim olunub.

Bunlardan əlavə bu sayda sənətin digər sahələrinə həsr olunmuş "Müasir mərhələlərdə tikinti, memarlıq və şəhərsalma siyasətilə bağlı problemlər" (Rüfət Ağazadə), "XVIII-XIX əsr Azərbaycan yaşayış evlərinin demokratik tərtibatı" (Nuranə Səlimli), "Hər insan bir dünyadır" (Lalə Hüseynova) başlıqlı yazıları da oxumaq olar.

A.Xiləli

Ədəbiyyat qəzeti.-2009.-20 noyabr.-S.6.