Oyanan Şərqin vicdan səsi
Məlum olduğu kimi, Azərbaycanın mədəni və ictimai fikrinin inkişafı yolunda mühüm xidmətlər
göstərmiş Cəlil
Məmmədquluzadənin 140 illik yubileyinin respublika səviyyəsində
layiqincə qeyd olunmasının təmin edilməsi məqsədilə
Azərbaycan Respublikasının
Prezidenti, cənab İlham Əliyev 6 fevral
2009-cu il tarixdə sərəncam imzalamışdır.
Bu sərəncamdan irəli gələn vəzifələrin
yerinə yetirilməsi
üçün cari ilin əvvəlindən bütövlükdə ölkəmizdə,
xüsusilə də ədibin vətəni olan Naxçıvan Muxtar Respublikasında müxtəlif səpkili tədbirlər keçirilmiş,
ədibin xatirəsi yad olunmuş, universitetin Tələbə Teatr Studiyasının
quruluşunda məşhur
"Ölülər" tragikomediyası
səhşnələşdirilərək
geniş tamaşaçı
kütləsinə təqdim
olunmuşdur.
Silsilə tədbirlərin davamı
olaraq Naxçıvan
Dövlət Universitetinin
Jurnalistika və dünya ədəbiyyatı
kafedrası "Cəlil
Məmmədquluzadə və
müasir dünyaya baxış" adlı elmi konfrans təşkil
etmişdir.
Rektor, akademik, görkəmli mirzəcəlilşünas
İsa Həbibbəyli
tədbiri giriş sözü ilə açmış, böyük
ustadın millətinin
cəhalətdən, mövhumatdan,
gerilikdən qurtarmaq yolundakı yorulmaz fəaliyyətindən ətraflı
danışmış, Mirzə
Cəlil yaradıcılığını
"oyanan Şərqin
vicdan səsi" kimi qiymətləndirmişdir. Natiq qeyd etmişdir ki, Azərbaycan ədəbiyyatının görkəmli
nümayəndəsi, böyük
yazıçı, dramaturq,
publisist və ictimai xadim Cəlil
Məmmədquluzadənin zəngin
irsi, bədii-estetik düşüncəsi
tariximizin parlaq səhifələrindəndir.
Sonra söz çıxışçılara
verilmişdir. Jurnalistika və
dünya ədəbiyyatı
kafedrasının müəllimi,
tarix elmləri namizədi Vaqif Məmmədov "Molla Nəsrəddin"də erməni xisləti",
"Curnalistika və dünya ədəbiyyatı"
kafedrasının müəllimi,
filologiya elmləri namizədi Şəhla Şirəliyeva "Cəlil
Məmmədquluzadə yaradıcılığının
ekran həyatı",
həmin kafedranın baş müəllimi, filologiya elmləri namizədi Xumar Məmmədova "Molla Nəsrəddin" mövzusu
müasir Amerika elmi-ədəbi mənbələrində", kafedra
müdiri, filologiya elmləri namizədi Seyid Surə "Satirik gülüşün
qüdrəti", universitetin
Mətbuat şöbəsinin
müdiri, filologiya elmləri namizədi
Mehriban Sultan "Cəlil Məmmədquluzadə
və demokratik cəmiyyət quruculuğu
tariximiz" mövzularında
məruzələr etmişlər.
Qeyd olunmuşdur ki, klassik Azərbaycan və dünya bədii fikir ənənələrindən, xalq
yumorundan məharətlə
bəhrələnən sənətkarın
milli oyanışa səsləyən yaradıcılığı
həm Qafqaz xalqlarının, həm də bir sıra
Şərq ölkələrinin
ədəbiyyatlarına
böyük təsir göstərmişdir. Vurğulanmışdır ki, ədibin yüz il əvvəl
yaratdığı "Ölülər",
milli vəhdət ideyasının
carçısına çevrilmiş
"Anamın kitabı",
eləcə də digər dram, nəsr və publisist əsərləri
Azərbaycanın çoxəsrlik
söz xəzinəsinin
qiymətli incilərini
təşkil edir.Cəlil Məmmədquluzadənin təşəbbüsü, redaktorluğu
və naşirliyi ilə çap olunan "Molla Nəsrəddin" jurnalının
ölkənin ədəbi-publisistik həyatında müstəsna rol oynamasından, milli məfkurənin formalaşmasına
layiqli töhfə verməsindən bəhs olunmuşdur.
Konfrans tələbələrin ifasında
Mirzə Cəlilin əsərlərindən parçaların
qiraəti ilə yekunlaşmışdır.
Tədbirdə Cəlil Məmmədquluzadənin
həyat və yaradıcılığını əks etdirən videoslayd da nümayiş
olunmuşdur.
Nərmin CƏFƏROVA
Ədəbiyyat qəzeti.-2009.-9 oktyabr.-S.8.