Xalq yazıçısı Anar güneyli ziyalılarla görüşmüşdür

Dünya Azərbaycanlıları Konqresinin (DAK) həmsədri, xalq şairi, Milli Məclisin deputatı Sabir Rüstəmxanlının dəvətilə dünya şöhrətli ziyalı, Kanada Qələm Təşkilatının keçmiş sədri Rza Bərahaninin başçılığı ilə ABŞ, Kanada, Almaniya, İngiltərə, İsveç və s. ölkələrdə yaşayan əslən Güney Azərbaycandan olan 12 tanınmış soydaşımız ölkəmizdə səfərdədir. Oktyabrın 5-də qonaqlar Milli Azərbaycan Tarixi və Nizami Gəncəvi adına Milli Azərbaycan Ədəbiyyatı muzeylərində olmuş, oktyabrın 6-da isə Azərbaycan Yazıçılar Birliyində (AYB) Birliyin sədri Anarla görüşmüşlər.

S.Rüstəmxanlı güneyli ziyalıları Anara təqdim etmiş, qonaqlara görkəmli yazıçının həyat və yaradıcılığı barədə ətraflı məlumat vermişdir.

Parçalanmış eyni millət olduğumuzu diqqətə çatdıran xalq yazıçısı bunun ədəbiyyatımızın aparıcı mövzusu olduğunu vurğulamış, neçə illər ərzində vətəndən kənarda yaşayan güneyli soydaşlarımızın dərdlərinə şərik olduğunu demişdir. Azərbaycan türklərinin öz hüquqlarını əldə etməyin yeganə yolunun ədəbiyyatdan keçdiyini bildirən Anar, Yazıçılar Birliyinin mətbuat orqanlarının qapılarının güneyli ziyalıların üzünə həmişə açıq olduğunu vurğulamışdır.

Anar dünya şöhrətli ziyalı Rza Bərahaniyə AYB-nin fəxri üzvlük vəsiqəsini təqdim etmişdir.

Ədəbiyyat qəzeti.-2009.-9 oktyabr.-S.7.