Vətən

Bağlansa qollarım, dartıb açaram,

Yurdum deyə sənə doğru qaçaram,

Oğlum desən, qanadlanıb uçaram,

Çiçəklənib, boyun bəzərəm, Vətən.

Bulud kimi göz yaşımı ələrəm,

Gül üzündən qəm tozunu silərəm,

Anasız körpətək sənsiz mələrəm,

Qəmlər dənizində üzərəm, Vətən.

Onda ki əllərim çatmadı sənə,

Ürəyim qanını qatmadı sənə,

O zaman ki, dilim yatmadı sənə,

Dilimi kökündən üzərəm, Vətən.

Sazımın mizrabı yad hava çalsa,

Fikrimi, duyğumu kəməndə salsa,

Gözdən iraq, yadlar ağlımı alsa,

Baş götürüb onda tezərəm, Vətən.

Ağlar, ağlamaz

Bir ürək ikiyə bölünsə gülüm,

Yanar ayrılıqdan, ağlar, ağlamaz?

Qalsa həsrət dünyada yar yarına,

Gecə-gündüz o, qan ağlar, ağlamaz?

Qardaşa qardaşdır pis gündə dayaq,

Kimsə sinə gərməz qardaşı sayaq,

Qasırğadan solsa çiçəkli bir bağ,

Gül becərən bağban ağlar, ağlamaz?

Qışın nəyi varsa qardı-küləkdi,

Yazın muştuluğu güldü, çiçəkdi,

İnsanı yaşadan arzu-diləkdi,

Ərzisini dansan, ağlar, ağlamaz?

Əbutalib ALLAHYARİ

Ədəbiyyat qəzeti.-2009.-9 oktyabr.-S.7.