İsa Həbibbəyli - 60
Hörmətli İsa müəllim!
Sizi - görkəmli Azərbaycan
ədəbiyyatşünasını və ictimai xadimi 60 yaşınızın
tamam olması münasibətilə təbrik
edirik.
Siz 1967-1971-ci illərdə indiki Naxçıvan Dövlət
Universitetinin filologiya fakültəsində təhsil
almış, ali məktəbi fərqlənmə
diplomu ilə bitirmisiniz. Azərbaycan Milli Elmlər
Akademiyasının Nizami
adına Ədəbiyyat
İnstitutunda ədəbiyyat
nəzəriyyəsi ixtisası
üzrə təhsilinizi
tamamlamış, 1980-ci ildə
"XX əsrin əvvəlləri
Azərbaycan romantik lirikasının sənətkarlıq
xüsusiyyətləri" mövzusunda namizədlik dissertasiyası müdafiə
etmisiniz. Əvvəlcə
Naxçıvan Muxtar
Respublikası Şərur rayonunun Danzik kəndində dil-ədəbiyyat müəllimi kimi fəaliyyət göstərmisiniz.
Sonra 1975-ci ildən etibarən taleyinizi Naxçıvan Dövlət
Universitetinə bağlamısınız.
Bu ali məktəbdə müəllimlikdən professorluğa
qədər şərəfli
yol keçmiş, Tələbə Elmi Cəmiyyətinin sədri,
elmi işlər üzrə prorektor kimi çalışdığınız
illərdə regionda elmin inkişafı, elmi əlaqələrin formalaşması istiqamətlərində
səmərəli işlər
aparmısınız. Sizin
1996-cı ildə Nizami adına Ədəbiyyat İnstitutunun
Dissertasiya Şurasında
"Cəlil Məmmədquluzadə:
mühiti və müasirləri" mövzusunda
etdiyiniz doktorluq dissertasiyası elmi-ictimai mühitdə əhəmiyyətli
hadisə kimi qarşılanmışdır.
Sizin 1996-cı ildən etibarən Naxçıvan
Dövlət Universitetindəki
rektorluq fəaliyyətiniz
bu ali təhsil
ocağının dünyada
tanıdılması, elmin
və ali təhsilin inkişafı baxımından çox səmərəli olmuşdur.
Siz universitetdəki Dissertasiya Şurasının
sədri, "Elmi əsərlər" jurnalının
baş redaktoru kimi də regionda
yeni elmi nəslin formalaşmasına
uğurla xidmət edirsiniz. Siz dəfələrlə dünyanın
müxtəlif ölkələrində
Azərbaycan elmini layiqincə təmsil etmisiniz. Əsərləriniz
Azərbaycanla yanaşı
Türkiyədə, Rusiyada,
Bolqarıstanda, Fransada, Belçikada, Pakistanda, İranda çap olunmuşdur. Sizin XX əsrin əvvəlləri
Azərbaycan ədəbiyyatının
müxtəlif problemlərinə
həsr olunmuş elmi əsərləriniz Azərbaycan ədəbiyyatşünaslıq
elminin daha da zənginləşdirilməsinə
xidmət edir. Ədəbiyyatşünaslıqdan başqa tarix, incəsənət, folklorşünaslıq
və sair kimi sahələrdə də səmərəli fəaliyyətiniz
sizin çoxaspektli elmi dünyagörüşə
malik olmağınızın
qanunauyğun nəticəsidir.
Sizin otuz ildən artıq davam etməkdə olan pedaqoji fəaliyyətiniz
yeni elmi nəsillərin və yüksək ixtisaslı mütəxəssislərin formalaşmasına
ciddi təsir göstərməkdədir.
Sizin çoxillik axtarışlarınız
sayəsində Azərbaycanda
Mirzəcəlilşünaslıq elminin yeni mərhələsi
formalaşmışdır.
Hörmətli İsa müəllim!
Əməkdar elm xadimi, Azərbaycan
Milli Elmlər Akademiyasının həqiqi
üzvü, Nyu-York Akademiyasının, Beynəlxalq
İnformasiyalaşdırma Akademiyasının həqiqi
üzvü kimi sizi beynəlxalq aləmdə də tanıyır, əsərlərinizə
istinad edirlər.
Azərbaycan Milli Məclisindəki fəaliyyətiniz Azərbaycanda
müstəqil dövlətçiliyin
daha da möhkəmləndirilməsinə
xidmət edir.
Hörmətli İsa müəllim!
Sizi bir daha anadan
olmağınızın 60 illiyi münasibətilə
ürəkdən təbrik
edir, sizə cansağlığı, çoxşaxəli
elmi-ictimai fəaliyyətinizdə
daha böyük uğurlar arzulayırıq.
Azərbaycan Yazıçılar Birliyi
Naxçıvan Yazıçılar Birliyi
“Ədəbiyyat qəzeti”nin
redaksiya heyəti səmim-qəlbdən bu təbrikə
qoşulur.
Ədəbiyyat qəzeti.-2009.-16
oktyabr.-S.6.