Yazıçılar Birliyində

Dünən Azərbaycan Yazıçılar Birliyinin Natəvan klubunda görkəmli şair Məmməd İsmayılın yetmiş illiyi ilə bağlı yubiley tədbiri keçirildi. Tədbiri açan və idarə edən AYB sədri, xalq yazıçısı Anar giriş sözündə M.İsmayılın şair və naşir kimi ədəbiyyatımızdakı dəyərli xidmətlərindən danışdı, hazırda Türkiyədə yaşayan və yaradan yubilyarın elmi-pedaqoji fəaliyyətinə də toxundu. "Atanı itirmək sosial problemdirsə, ananı itirmək psixoloji problemdir" - deyən Anar erkən yaşlarında müharibədən qayıtmayan atasını itirmiş Məmməd İsmayılın ana himayəsində çətinliklə ərsəyə yetdiyini, keşməkeşli, əzablı bir həyat yolu keçdiyini iştirakçıların diqqətinə çatdırdı və onun istedadı, zəhməti, iradəsi hesabına çağdaş poeziyamızda öz layiqli yerini tutmağı bacardığını vurğuladı. Şair Abbas Abdulla M.İsmayılı Azərbaycanın öndə gələn şairlərindən biri kimi dəyərləndirərək onu yetmiş illik yubileyi münasibətilə ürəkdən təbrik etdi.

AYB-nin məsul katibi Nazim İbrahimov Dövlətnəşrkoma rəhbərlik etdiyi dövrdə M.İsmayılın "İşıq" nəşriyyatını dirçəltməyindən, dəyərli nəşrlər üzə çıxartmağından və ümumən bir naşir kimi söz sənətinə, kitab mədəniyyətinə məsuliyyətlə yanaşmasından danışdı, yubilyarı yetmiş yaşının tamamında təbrik etdi. "Azərbaycan" jurnalının baş redaktoru İntiqam Qasımzadə M.İsmayılı bu jurnalın ətrafında cəmləşən müəllif kontingentində ən istedadlılarından və ən fəallarından hesab etdiyini vurğuladı.

Şairin həmyerlisi, jurnalist Aydın İsmayılov uşaqlıq illərindən bu vaxta kimi dostluq etdiyi M.İsmayılın həm şair, həm insan kimi çox dəyərli məziyyətlərindən danışdı.

Nasirlərdən Seyran Səxavət, Mustafa Çəmənli, şairlərdən Musa Ələkbərli, Adil Cəmil, Zirəddin Qafarlı, Qulu Ağsəs, Dayandur Sevgin, Məlahət Yusifqızı, tənqidçi Vaqif Yusifli çıxış edərək yetmiş yaşı tamam olan görkəmli şairin poetik yaradıcılığına, elmi-pedaqoji fəaliyyətinə, naşirlik xidmətinə yüksək dəyər verdilər. Sonda M.İsmayıl başda AYB sədri, xalq yazıçısı Anar olmaqla bütün iştirakçılara öz təşəkkürünü bildirdi.

Ədəbiyyat qəzeti.-2009.-30 oktyabr.-S.4.