Bu günlərdə AYB-nin "Bayatı" kitab mağazasında şair Qəşəm Nəcəfzadənin "Oğlum, qapını aç o qapıda bir külək ölür" şeirlər kitabının imza günü keçirildi.

Tədbirin aparıcısı AYB-nin katibi Rəşad Məcid müəllifin yaradıcılığından ətraflı söhbət açıb, onun kitablarının bir çox Avropa ölkələrində sevilərək oxunmasını Azərbaycan ədəbiyyatının uğuru adlandırdı.

Şair Ənvər Əhməd çıxışında qeyd etdi ki, Q.Nəcəfzadə müasir poeziyamızda öz sözü, yeri olan şairdir.

Şairə Mahirə Abdulla qələm dostundan maraqlı, orijinal şair kimi bəhs etdi.

Tənqidçi Vaqif Yusifli Q.Nəcəfzadəni daima axtarışda olan, şeirlərində bənzətmələrə, metaforalara üstünlük verən milli modern şerinin nümayəndəsi kimi təqdim etdi.

Müəllifin kitablarının tərcüməçisi Sevil Gültən şairin şeirlərinin xarici ölkələrdəki uğurundan, şairlərdən Balayar Sadiq, Səlim Babullaoğlu, Musa Ələkbərli, Əkbər Qoşalı və Dayandur Sevgin şairin son dövr yaradıcılığından, onun şeirlərindəki obrazların həyatiliyindən söhbət açdılar.

Sonda Q.Nəcəfzadə tövsiyə etdi ki, hər kəs kitab oxusun, çünki kitab hərəkətdir və kitab olmasa biz ölərik.

S.Sadıqlı

Ədəbiyyat qəzeti.-2009.-30 oktyabr.-S.6.