Təqdimat

Yanvarın 16-da Azərbaycan Yazıçılar Birliyinin Natəvan klubunda filologiya elmləri doktoru, professor Əzizxan Tanrıverdinin "Poeziyanın dili, dilin poeziyası" kitabının təqdimetmə mərasimi keçirildi. Tədbiri giriş sözü ilə açan Yazıçılar Birliyinin katibi Arif Əmrahoğlu müəllif haqqında öz ürək sözlərini söyləyərək bildirdi ki, biz bu gün bura dilçi alimin yox, fıloloq alimin kitabının təqdimatına toplaşmışıq. Əzizxan Tanrıverdi Azərbaycan fılologiya elmində az saylı alimlərdən biridir ki, əsərlərinin çoxunu "Kitabi-Dədə Qorqud" abidəsinin tədqiqinə həsr etmişdir. O, milli təfəkkürümüzün dərin tərəflərini görür. Sonra tədbiri aparmaq üçün sözü kitabın redaktoru İlham Abbasa verdi. O, kitab haqqında öz fıkirlərini bildirdi: "Ə.Tanrıverdi bu kitaba daxil olan məqalələrdə on doqquz şairin poeziyasından bəhs etmişdir. Onların çoxu müasir poeziyamızın "80-cilər" adlandırılan nəslinin təmsilçiləridir.

Bu şeirlərdən bəhs edərkən alimin klassik poeziyamızın Dədə Qorqud, Nəsimi, Füzuli, Vaqif, Cavid, Vurğun kimi korifeyləri ilə apardığı paralellər, müasir poeziyamızın həm mövzu və ideya, həm də dil və ruhən həmin ölməz ənənələrə bağlılığının sübutu kimi gətirdiyi dəlillər də onun konsepsiyasının doğruluğunu təsdiq edir".

Filologiya elmləri doktoru Təyyar Salamoğlu "Poeziyanın dili, dilin poeziyası" kitabı haqqında geniş məruzə ilə çıxış etdi.

Filologiya elmləri doktoru, professor Vilayət Əliyev qeyd etdi ki, hər bir dövrün tələbləri və həyata baxış müxtəlifliyi var. Əzizxan Tanrıverdi yaxın keçmişdə yaşamış söz yaradıcılarını geniş şəkildə təhlil etmişdir.

Şairə Firuzə Məmmədli dedi ki, poetik nitqin dil baxımından tədqiqi bədii materialın düzgün və dəqiq şərhini əsaslandıran amillərdəndir. Çox yaxşı haldır ki, müasir dövrdə dilçi mütəxəssislərimiz bu məsələyə geniş önəm verirlər. Bu sahədə fəal surətdə qələm işlədən görkəmli tədqiqatçılardan biri də Əzizxan Tanrıverdidir.

Təqdimat mərasimində çıxış edən Əjdər Ol Ə.Tanrıverdinin yaradıcılığını tanıdığı insanların yaradıcılığına təbliğ etdiyini, kiməsə xoş gəlsin deyə yox, sırf forma və məzmun gözəlliyini, dil, üslub baxımından hərtərəfli olduğunu bu kitabda müqayisəli şəkildə göstərdiyini söylədi.

Tədbirdə daha sonra çıxış edənlər - şair Oqtay Rza, Əlirza Xələfli, Sayalı Əsədova, Təranə Rəhimli, Məhəbbət Nizami, Adil Mirseyid, Sabir Sarvan və başqaları Əzizxan Tanrıverdinin yaradıcılığından və təqdim olunan kitabın məziyyətlərindən söz açdılar.

Sonda Əzizxan Tanrıverdi çıxış edənlərə, məclisə toplaşanlara öz təşəkkürünü bildirdi.

M.Qənbərova

Ədəbiyyat qəzeti.-2009.-23 yanvar.-S.6.