Cəlil Məmmədquluzadə -140

Bu günlərdə Naxçıvan Dövlət Universitetinin Tələbə Teatr Studiyasının yaradıcı heyətinin ifasında görkəmli yazıçı Cəlil Məmmədquluzadənin "Ölülər" komediyası əsasında hazırlanmış eyniadlı tamaşaya ictimai baxış keçirildi. C.Məmmədquluzadənin anadan olmasının 140, "Ölülər" pyesinin 100 illiyi ərəfəsində hazırlanan tamaşada sözü gedən universitetin müxtəlif fakültələrində təhsil alan tələbələri çıxış edirdi. Universitetin Sosial idarəetmə və turizm kafedrasının baş müəllimi, əməkdar mədəniyyət işçisi Gülxarə Əhmədovanın rejissorluğu ilə hazırlanan tamaşada iştirak edən tələbələrin maraqlı oyun tərzi razılıq doğurdu.

Tamaşadan sonra universitetin rektoru, akademik İsa Həbibbəyli, Jurnalistika və dünya ədəbiyyatı kafedrasının dekanı, dosent İman Cəfərli, xarici tələbələrlə iş üzrə dekan, dosent Xanəli Kərimli, tədris işləri üzrə prorektor Hüseyn Həşimli, Mühəndislik və memarlıq fakültəsinin müəllimi Cavid İsmayılov, tərbiyə işləri üzrə prorektor, fəlsəfə elmləri doktoru Məmməd Rzayev və başqaları aktyor oyunu ilə bağlı fikir və iradlarını bildirdilər, gənc istedadlara bu yolda müvəffəqiyyətlər arzuladılar.

Sonda universitetin Tələbə Həmkarlar İttifaqının sədri Sərxan İsmayılov Tələbə Teatr Studiyasının kollektivinə müxtəlif mükafatlar təqdim etdi.

Universitetin müəllimi Cavad İsmayılovun səhnə, Günay Məmmədovanın musiqi tərtibatı verdiyi tamaşanın Naxçıvanla yanaşı Bakı ali məktəblərində və Türkiyə Cümhuriyyətinin Qars Qafqaz Universitetində də göstərilmə si nəzərdə tutulub.

M.Sultan

Ədəbiyyat qəzeti.-2009.-23 yanvar.-S.6.