Natəvan klubunda
Yanvarın 16-da Azərbaycan
Yazıçılar Birliyinin Natəvan klubunda filologiya elmləri
doktoru, professor Əzizxan Tanrıverdinin "Poeziyanın dili,
dilin poeziyası" kitabının təqdimetmə mərasimi
keçirildi. Tədbiri giriş sözü ilə açan
Yazıçılar Birliyinin katibi Arif Əmrahoğlu dedi:
"Əzizxan Tanrıverdi Azərbaycan filologiya elmində az
saylı alimlərdən biridir ki, əsərlərinin
çoxunu "Kitabi-Dədə Qorqud" abidəsinin tədqiqinə
həsr etmişdir. 0 milli təfəkkürümüzün
dərin tərəflərini görür".
Tədbirin
aparıcısı İlham Abbas redaktoru olduğu kitab
haqqında öz fıkirlərini bildirdi: "Ə.Tanrıverdi
bu kitaba daxil olan məqalələrdə on doqquz şairin
poeziyasından bəhs etmişdir. Onların çoxu
müasir poeziyamızın "80-cilər"
adlandırılan nəslinin təmsilçiləridir.
Bu şeirlərdən bəhs
edərkən alimin klassik poeziyamızın Dədə Qorqud,
Nəsimi, Füzuli, Vaqif, Cavid, Vurğun kimi korifeyləri ilə
apardığı paralellər, müasir poeziyamızın həm
mövzu və ideya, həm də dil və ruhən həmin
ölməz ənənələrə
bağlılığının sübutu kimi gətirdiyi dəlillər
də onun konsepsiyasının doğruluğunu təsdiq
edir". Filologiya elmləri
doktoru Təyyar Salamoğlu "Poeziyanın dili, dilin
poeziyası" kitabı haqqında geniş məruzə ilə
çıxış etdi.
Filologiya elmləri
doktoru, professor Vilayət Əliyev qeyd etdi ki, hər bir
dövrün tələbləri və həyata baxış
müxtəlifliyi var. Əzizxan Tanrıverdi yaxın
keçmişdə yaşamış söz
yaradıcılarını geniş şəkildə tədqiq
etmişdir.
Şairə Firuzə Məmmədli
dedi ki, poetik nitqin dil baxımından tədqiqi bədii
materialın düzgün və dəqiq şərhini əsaslandıran
amillərdəndir. Çox yaxşı haldır ki, müasir
dövrdə dilçi mütəxəssislərimiz bu məsələyə
geniş önəm verirlər.
Tədbirdə
çıxış edənlər - Oqtay Rza, Əjdər Ol, Əli
Rza Xələfli, Sayalı Əsədova, Təranə Rəhimli,
Məhəbbət Nizami, Adil Mirseyid, Sabir Sarvan və
başqaları Əzizxan Tanrıverdinin
yaradıcılığından və təqdim olunan
kitabın məziyyətlərindən söz açdılar.
Sonda Əzizxan
Tanrıverdi çıxış edənlərə, məclisə
toplaşanlara öz təşəkkürünü bildirdi.
M.Qənbərova
Ədəbiyyat qəzeti.-2009.-30
yanvar.-S.6.