VIII Dünya Konqresində

Beynəlxalq elmi ictimaiyyətin həyatında mühüm hadisə sayılan VIII Dünya Konqresi İsveçin paytaxtı Stokholm şəhərində keçirilmişdir. Əsasən humanitar elmlər üzrə alim və mütəxəssislərin qatıldığı bu konqres "Avrasiya: daha geniş əməkdaşlığın perspektivləri" mövzusuna həsr olunmuşdu. Azərbaycanı VIII Dünya Konqresində Milli Elmlər Akademiyasının Ədəbiyyat İnstitutunun və Atatürk Mərkəzinin Beynəlxalq əlaqələr şöbəsinin baş elmi işçisi, fəlsəfə elmləri doktoru, professor Rahid Ulusel (Xəlilov) təmsil etmişdir. Onun "Harmoniya fəlsəfəsi və yeni dünya nizamı prinsipləri" mövzusundakı çıxışı müasir beynəlxalq münasibətlər probleminə nəzəri-konseptual yanaşma kimi maraq doğurmuşdur. Avrasiyadakı qlobal əməkdaşlığın reallıqları və daha geniş perspektivlərinin müzakirə olunduğu konqresdə, təbii ki, həm də Azərbaycanın həmin proseslərdəki fəal roluna toxunulmuşdur. Konqresin ölkəmiz üçün əhəmiyyət kəsb edən cəhəti eyni zamanda bundadır ki, bir sıra alim və siyasətçilərin çıxışında Sovet İttifaqının dağılmasından sonra müstəqil respublikaların yaranması kimi tarixi bir situasiyada Heydər Əliyevin həmin proseslərə pozitiv təsir göstərən qətiyyətli mövqeyi, bu gün Azərbaycan Respublikasının geniş Avrasiya məkanında qlobal əməkdaşlığın təməlini təşkil edən enerji layihələrinin həyata keçirildiyi ölkə olması və bununla yanaşı, Cənubi Qafqaz regionunda sülh və sabitliyə ciddi əngəl törədən konfliktlərin aradan qaldırılması, xüsusilə Azərbaycan ərazisi olan Qarabağın işğalı faktının beynəlxalq ictimaiyyət tərəfindən təsdiqlənməsi zərurəti vurğulanmışdır. "Heydər Əliyev və Azərbaycan-dünya münasibətləri: siyasətdən mədəniyyətədək" kitabının müəllifı Rahid Ulusel müzakirələrdə Azərbaycanla bağlı səslənən fıkirlərə münasibətini bildirmişdir.

Qeyd edək ki, 2000 və 2005-ci illərdə VI və VII Dünya konqresləri Avropanın inteqrasiyası problemlərinə həsr olunmuşdu. Növbəti IX Dünya Konqresi 2015-ci ildə Yaponiyanın paytaxtı Tokio şəhərində keçiriləcəkdir.

Elm.- 2010.- 31 avqust.- S.12.