“Ehtimal nəzəriyyəsi və riyazi statistika ensiklopediyası”

Son illər cəmiyyətin sürətlə gedən inkisafı yeni biliklərə qısa zamanda yiyələnməyi tələb edir. Elm və texnikanın inkisafı, elmin yeni sahələrinin və istiqamətlərinin yaranması, elmin müxtəlif sahələrinin bir-birinə qovuşması yeni müasir terminlərin və anlayışların yaranmasına səbəb olmuşdur. Ona görə də bu sahələri əhatə edən, müasir elm və texnikanın tələblərinə cavab verən müxtəlif ensiklopedik lüğətlərin və ensiklopediyaların nəşri zamanın tələbatına çevrilmişdir. Amma Azərbaycan dilində mövcud olan ensiklopedik lüğətlər və ensiklopediyalar sürətlə inkisaf edən elm və texnikanın tələblərinə cavab vermir. Bu səbəbdən yeni ensiklopedik lüğətlərin və ümumiyyətlə, ensiklopediyaların nəşrinə böyük ehtiyac yaranır.

Azərbaycan Milli Elmlər Akademiyası Terminologiya Komissiyasının 5 may 2008-ci il tarixli qərarı ilə bu yaxınlarda akademik Cəlal Allahverdiyevin, AMEA-nın müxbir üzvü Asəf Hacıyevin, fizika-riyaziyyat elmləri namizədi Həqiqət Əhmədovanın birgə hazırladıqları "Ehtimal nəzəriyyəsi və riyazi statistika ensiklopediyası" "Elm" RNPM-in mətbəəsində nəşr olunmuşdur.

"Ehtimal nəzəriyyəsi və riyazi statistika ensiklopediyası"na Kibernetika İnstitutunun direktoru, akademik Telman Əliyev və Fizika-Riyaziyyat Elmləri Bölməsinin akademik-katibi, akademik Akif Hacıyev rəy vermişlər.

Geniş oxucu auditoriyasına təqdim olunan bu ensiklopediyada toplanan termin və anlayışların əsasını müəlliflərin 2002-ci ildə Bakıda "Gənclik" nəşriyyatında çap olunmuş "Ehtimal nəzəriyyəsi və riyazi statistika" terminoloji lüğəti təşkil edir.

Ensiklopediyada təqdim olunan 5200 termin və anlayışa aid məqalələr əlifba ardıcıllığı ilə verilmişdir. Hər terminin adı Azərbaycan, ingilis və rus dillərində verilir. Belə yanaşma ədəbiyyatda rus və ya ingilis dillərində rast gəlinən terminlərin Azərbaycan dilində geniş izahının əldə olunmasına kömək edəcəkdir.

"Ehtimal nəzəriyyəsi və riyazi statistika ensiklopediyası" ehtimal nəzəriyyəsi, riyazi statistika və onun elm və texnikanın müxtəlif sahələrində tətbiqi üzrə məlumat xarakterli nəşrdir. Ensiklopediyada verilmiş hər bir sahə üzrə məqalələr geniş və dərin elmi xarakter daşıyır, bu sahənin əsas anlayışlarını əhatə edir, onlar haqqında kifayət qədər məlumat verərək, eyni zamanda, bu sahənin müasir vəziyyətindən xəbər verir. Ensiklopedik biliklər bir nəşrdə toplandığı üçün oxuculara qısa zamanda ətraflı məlumat verərək cəmiyyətin müxtəlif təbəqələrinə - tələbələrə, aspirantlara, müəllimlərə, müxtəlif sahələrdə çalışan alim və mütəxəssislərə, ehtimal nəzəriyyəsi və riyazi statistikanın termin və anlayışlardan istifadə edən və ümumiyyətlə, bu sahə ilə bağlı olan elmin müxtəlif istiqamətlərində çalışan və maraqlanan insanların tələblərinə xidmət edə biləcəkdir.

Elm.- 2010.- 9 iyun.- S.12.