Geologiya İnstitutunun tədqiqatlarının nəticəsi beynəlxalq sərgidə nümayiş etdirilmişdir

Bu günlərdə İspaniyanın Barselona şəhərində Geoloq və Geofizik-alimlərin və Mühəndislərin Avropa Assosiasiyası "Geologiya elminin yeni baharı" adlı 72-ci beynəlxalq konfransı və sərgini keçirmişdir. Konfransda dünyanın əksər ölkələrindən olan 5000-dən çox alimin 900-dən çox məruzəsi dinlənilmiş, sərgidə isə 300-ə yaxın təşkilatın mühüm elmi nəticələri, o cümlədən müasir elmi texnologiya məhsullan nümayiş etdirilmişdir.

Tədbirlərdə Azərbaycan Milli Elmlər Akademiyası Geologiya İnstitutu da təmsil olunmuşdur. Belə ki, institutun Neft və qaz geologiyası və geokimyası şöbəsinin rəhbəri, AMEA-nın müxbir üzvü Əkpər Feyzullayev konfransda "Cənubi Xəzər hövzəsində anomal təzyiqlər: yayılması və mənşəyi" mövzusunda məruzə ilə çıxış etmiş, sərgidə isə "Seysmik məlumatlara əsasən Cənubi Xəzər hövzəsində anomal təzyiqlərin proqnozu" mövzusu istiqamətində institutda aparılmış tədqiqatların nəticələrini nümayiş etdirmişdir.

Elm.- 2010.- 30 iyun.- S.12.