AZƏRBAYCANDA GEOLOGİYA ELMİNİN YENİ İSTİQAMƏTİ –TİBBİ GEOLOGİYA

Azərbaycan Milli Elmlər Akademiyası (AMEA) Geologiya İnstitutu yeni tədqiqatlar istiqamətini müəyyənləşdirib ki, bu da tibbi geologiyadır. Bu istiqamətdə aparılacaq tədqiqatlar bəzi geoloji obyektlərin və proseslərin canlı aləmə, o cümlədən insan səhhətinə təsirini öyrənəcək. İnstitut bu tip tədqiqatlara başlamaq üçün xarici ölkələrin təcrübəsindən istifadə etməyə çalışır. Bu niyyətlə Geologiya İnstitutunun gənc əməkdaşı Fərəh Vəliyeva Tehranda keçirilmiş "Tibbi geologiya" adlı I beynəlxalq simpoziumda iştirak etmişdir. Gənc alim Türkiyə, Çexiya, Efiopiya, Gürcüstan, Tacikistan, İndoneziya və s. ölkələrin də təmsil olunduğu tədbirdə "Azərbaycanda tibbi geologiyanın problemləri" adlı məruzə ilə çıxış etmişdir. Məruzə simpozium iştirakçılart tərəfindən böyük maraqla qarşılanmışdır.

İranın Atom Enerjisi Təşkilatının təmsilçisi Azərbaycanda radonun öyrənilməsi, İranın Geoloji Araşdırmalar Mərkəzinin nümayəndəsi isə Geologiya İnstitutu ilə tibbi geologiya üzrə əməkdaşlıq etmək niyyətlərini bildirmişlər.

Qeyd edək ki, AMEA Geologiya İnstitutu Azərbaycan ərazilərindəki radon qazı ilə bağlı 20 ildir tədqiqatlar aparır. Tibbi geologiya isə ölkəmizdə indiyəcən öyrənilməmişdir.

Samirə KƏRİMOVA

Elm.- 2010.- 30 iun.- S.12.