Arxeoloji tədqiqatlar davam etdirilir

AMEA Arxeologiya və Etnoqrafiya İnstitutunun ekspedisiyası iyunda Tovuz rayonunda arxeoloji tədqiqatlar aparacaqdır. İlk olaraq Tovuz arxeoloji ekspedisiyası Fransa arxeoloqları ilə birlikdə Aşağı Ayıblı kəndində bizim eradan əvvəl V minilliyə aid olan qədim yaşayış yerində və hazırda Avropa arxeoloqlarının diqqət mərkəzində olan Göytəpə neolit dövrü yaşayış yerində arxeoloji qazıntıları davam etdirəcəklər.

Bu ilin sentyabrında Göytəpə abidəsinin qazıntılarına Yaponiyanın Tokio Universitetinin arxeoloqlarından ibarət böyük bir dəstə də qatılacaqdır.

Tədqiqatlara Bakı Dövlət Universitetinin tarix fakültəsinin tələbələrinin də cəlb olunması nəzərdə tutulmuşdur. Bu il yay mövsümü zamanı arxeoloji tədqiqatlarla yanaşı, tələbələrin hazırlanması məsələsi ekspedisiyanın əsas işlərindən biri olacaqdır. Növbəti illərdə qazıntılarda iştirak edəcək tələbələrin arxeologiya elminin mükəmməl öyrənmələri məqsədi ilə bir sıra xarici ölkələrdə məşğələlərə cəlb edilmələri də nəzərdə tutulmuşdur.

Bundan əlavə, Tovuzda aparılan arxeoloji qazıntılarla tanış olmaq məqsədi ilə bir sıra Avropa ölkələrinin arxeoloji mərkəzlərindən mütəxəssislərin gəlməsi gözlənilir.

Elm.- 2010.- 26 may.- S.12.