Azərbaycan florasının tədqiqi istiqamətində Beynəlxalq əlaqələr genişləndirilir

Rusiya Elmlər Akademiyasının (REA) V.L.Komarov adına Botanika İnstitutunun (Sankt-Peterburq) görkəmli alimləri- iki dəfə Rusiyanın Dövlət Mükafatı laureatı, REA-nın müxbir üzvü, Herbari şöbəsinin müdiri Rudolf Vladimiroviç Kamelin, b.e.d. Olqa Petrovna Kamelina, b.e.n. İqor Germanoviç Leviçev və b.e.n. Lyudmila Stepanovna Kra-sovskaya AMEA Botanika İnstitutunda olmuşlar.

Rus alimlərinin Azərbaycana səfərinin məqsədi Botanika İnstitutunun zəngin Herbari fondunda tədqiqat aparmaq, həmçinin Azərbaycan botanikləri ilə birlikdə bir sıra qoruqların ərazilərində ilkin yaz florası ilə tanışlıq və bu ərazilərdə yayılmış bəzi bitki növlərinin taksonomik statusunun müəyyənləşdirilməsi üçün onların filogeniyasını öyrənməkdən ibarətdir.

Qeyd edək ki, Rusiya Botanika Cəmiyyətinin prezidenti R.Kamelin həm də "Бoтанический" və "Turczaninowia" jurnallarının baş redaktorudur. O, dağlıq ərazilərin florasının filogenetik (tarixi) analizi üzrə 800-dən artıq elmi əsər və çoxsaylı monoqrafiyaların müəllifidir. Olqa Kamelina isə bitkilərin klassik (müqayisəli və sistematik) embriologiyası, xüsusilə çiçəkli bitkilərin filogenetik sistematikasında embrioloji əlamətlərdən istifadə metodunun işlənib hazırlanması sahəsində tanınmış mütəxəssisdir.

Qonaqlar institutun direktoru vəzifəsini icra edən b.e.d. Validə Əlizadə ilə görüşmüşlər. Gələcək əməkdaşlıq əlaqələri istiqamətində razılıq əldə edilmiş və elmi əməkdaşlıq haqqında müqavilə imzalanmışdır.

Elm.- 2011.- 31 mart.- S.21.