XƏYANƏT NÖQTƏSİ

(əvvəli ötən saylarımızda)

Reyçel Sekston artıq məntiqlə düşünə bilmirdi. İndi o nə meteorit, nə skanerin nəticələri, nə Min, nə də kommandosların qorxunc hücumu haqqında düşünürdü. İndi vacib olan başqa şey idi.

Sağ qalmaq!

Aşağıda sonsuz sürüşkən şosseni xatırladan buz. Reyçel bədənində nə baş verdiyini anlaya bilmirdi: ya qorxudan hissiyatını itirmişdi, ya da kip kostyum onu qoruyurdu. Ağrını hiss etmirdi. Heç nə hiss etmirdi.

Lakin hər halda...

Reyçel qurşaqdan bağlı olduğu Tollandı qəribə bir şəkildə qucaqlamışdı.

Hardasa qarşıda daha çox yarış avtomobilinin tormozlu paraşütünü xatırladan küləklə dolu şar balonu dalğalanırdı. Arxalarından gələn Korki, idarəsini itirmiş treyler kimi oradan-oraya diyirlənirdi. Hücuma məruz qaldıqları yeri göstərən işarə fişənglər uzaqlaşıb gözdən itmişdilər. Onların sürəti artdıqca, buza sürtünən neylon paltarlarından çıxan fit səsi artırdı. Hansı sürətlə hərəkət etdiklərini müəyyənləşdirmək çətin idi. Ağaşıdakı hamar səth get-gedə daha sürətlə qət edilirdi. Görünür, dayanıqlı hava şarı cırılmaq, uçuşu ləngitmək, sərnişinlərini yarı yolda qoymaq "fikrində deyildi".

Reyçel "canımızı qurtarmalıyıq!" deyə düşündü. Axı onlar bir ölüm təhlükəsindən digərinə tərəf yüyürürdülər. Yəqin ki, okean bir mildən o yana deyil! Buzlu su haqqında sadəcə düşünmək belə onun qorxulu xatirələrini oyadırdı.

Külək şiddətləndikcə sürət də artırdı. Arxadan Korkinin qorxunc bağırtısı eşidilirdi. Reyçel anlayırdı ki, artıq bir neçə dəqiqədən sonra hər üçü sürətlə buz uçurumu keçərək okean dalğalarının ağuşuna düşəcəklər.

Görünür, Tolland da bu haqda düşünürdü- o, bağları açmağa çalışırdı.

- Aça bilmirəm! - o, bağırdı. - Gərginlik çox yüksəkdir!

Reyçel küləyin heç olmasa bir anlıq səngiməsinin Tollanda kömək edəcəyini düşündü. Lakin amansız külək daha əzmlə vıyıldayırdı. O, əyilərək var gücü ilə irəliyə cumdu və dabanlarını buza çırpdı. Ətrafa xoruz quyruğunu xatırladan buz parçaları səpələndi. Sürət bir qədər səngidi.

- Haydı! - Reyçel qışqırdı.

Şarın yük ipinin gərginliyi bir anlıq zəiflədi. Tolland canını qurtarmaq üçün ipi çəkməyə başladı.Alınmadı.

- Bir də cəhd elə! - deyə qışqırdı.

Bu dəfə onların hər ikisi eyni anda əyilərək dabanlarını buza çırpdılar. Bu dəfə ətrafa daha çox buz və qar səpələndi. Sürət bir xeyli azalmışdı.

- Bir daha! - Tolland əmr etdi.

Bir anlıq hər ikisi dayandılar. Gərginlik azaldı. Maykl kəmərinə bərkidilmiş kilidi açmağa çalışdı. Bu dəfə o, hədəfə daha yaxın idi, lakin gərginlik hələ də güclü idi. Nora kəmərlərindəki bu bağlantının yüksək keyfiyyətli, möhkəm, metal üzərində əlavə dəlikli, istənilən mümkün gərginliyə tab gətirən təhlükəsizlik kilidlərinin olması ilə əbəs yerə öyünmürdü.

Reyçel indi onların məhz bu kilidlərin sayəsində ölümə sürükləndiklərini düşündü. Lakin bu təzad o qədər yersiz idi ki...

- Bir də cəhd göstərək! - Tolland əmr etdi.

Reyçel bütün gücünü və enerjisini toplayaraq əyildi və tikanlı çəkmələrini buza çırpdı. Tolland da eyni hərəkəti təkrar etdi. Qurşaqlarındakı bəndlər birləşdirici kanatı son həddə qədər dartmışdı. İndi onlar kürəkləri üstündə sürüşürdülər. Tolland ayaqlarını möhkəm-möhkəm buza sıxdı, Reyçel isə qövs kimi büküldü. Titrəyişdən az qala ayaqları sınacaqdı. Reyçel sümüklərinin tab gətirməyəcəyindən qorxurdu.

- Haydı... haydı... - Tolland sürət azalmışkən bütün gücünü toplayaraq kilidi açmağa çalışırdı. - Az qalıb...

Gözlənilmədən Reyçelin çəkmələrindəki tikanlar çaqqıldadı. Metal sıxaclar qopdu və tikanlı altlıqlar arxada Merlinsonun üzərindən qövs cızaraq gecənin qaranlığında yox oldular. Hava şara var gücü ilə irəliyə cumdu. Tollandla Reyçel yan tərəfə yıxıldılar. Gözlənilməz təkandan Maykl əlindəki kilidi itirdi.

- Lənətə gələsən!

Bir ara hərəkət sürətini itirdiyindən hiddətlənən hava şarı küləyin şiddətinə qoşuldu. İndi o okeanın yaxınlıqda olduğunu hiss edirmiş kimi, buzlaq boyu daha sürətlə irəliləyirdi. Reyçel sürətlə yarğana doğru yaxınlaşdıqlarını hiss edirdi. Şimal Buzlu okeanadək onları hələ daha bir dəhşətli təhlükə gözləyirdi. Üç böyük qar yığını yolu kəsmişdi. Bu sürət müqabilində onları termokombinezonlar belə qar və buz qalağından sağ-salamat keçirə bilməyəcəkdi.

Birləşdirici kanatla mübarizə aparan Reyçel hava şarından qopmaq üçün yol axtarırdı. Gözlənilmədən buza dəyən taqqıltı - sürətli stakkato, metalın təmiz, üzərini qar örtməmiş buzla təmasından yaranan səs eşitdi.

Buz baltası!

Qorxu və təlaşdan kəmərinə möhkəmcə bərkidilmiş buz baltasını unutmuşdu. Yüngül alüminium alət.... Reyçel hava şarına tərəf uzanan ipə baxdı. Qalın hörgülü neylon kanat. Reyçel əlini buz baltasına tərəf uzatdı. Dəstəyindən yapışaraq var gücü ilə dartdı, elastik bağı son həddə qədər çəkdi. Hələ də yan üstdə uzanıqlı halda əllərini yuxarı, başının arxa tərəfinə qaldırdı. Baltanın diş-diş tiyəsini qalın, dartılmış kanata dirədi. Naşıcasına mişarlamağa başladı.

- Hə! - Tolland sevinclə öz buz baltasından yapışdı.

Reyçel əllərini başının arxasına qaldırmış vəziyyətdə buzlaq boyu aşağı sürüşərək bir qədər əvvəl onları xilas etmiş, indisə ölümə sürükləyən kanatı var gücü ilə mişarlayırdı. Sintetik, olduqca möhkəm kəndir artıq tab gətirmirdi. Tollanda da mümkün qədər əyildi, əllərini qaldıraraq, elə həmin nöqtədən, yalnız bir az aşağıdan mişarlamağa başladı. İki balta ilə sanki odunçular kimi sinxron işləyirdilər. Bəzən tiyələr toqquşur, ətürpədici metal səsi eşidilirdi.

Onlar asta-asta qalın kanatı kəsdilər.

Ümid parladı. Onlar bunu bacaracaqdılar! Kanat onların gücünə tab gətirməyəcəkdi!

Qəfildən onları sürətlə irəli çəkən gümüşü rəngli şar şaquli hava kütləsinə qarışmış kimi yuxarı şığıdı. Reyçel dəhşət içərisində belə şarın sadəcə yer səthinin çevrəsi üzrə hərəkət etdiyini anladı.

Çatdıq.

Ağ qar divar yolu bir anlıq kəsdi. Bir göz qırpımında onlar artıq divarın üstündə idilər. Aldığı zərbədən Reyçelin nəfəsi kəsilirdi. Buz baltası əlindən düşdü. Reyçel müqavimət göstərməyə taqəti olmayan dalğaya düşmüş su xizəkçisi kimi Tollandla birlikdə yamac boyu yuxarı çəkildiklərini hiss edirdi. Yarıya qədər kəsilmiş kanat onları möhkəm saxlayır, aşağı və düzənlik boyu növbəti qar dağına tərəf aparırdı. Daha iki yamac, daha sonra isə o qədər də böyük olmayan yayla, oradan isə okean ənginliklərinə düşən uçurum.

Sanki Reyçeli ağuşuna almış lal dəhşətin harayı kimi Korki Merlinsonun əlacsız bağırtısı ətrafa yayıldı. O, haradasa arxada hələ birinci dağın yamacıyla diyirlənirdi. Şar isə sanki qəfəsdən qurtulmuş vəhşi kimi onları hey irəli və irəli dartırdı.

Qəfildən başları üzərində güllə səsinə oxşayan səs eşidildi. Nəhayət ki, yarıya qədər kəsilmiş kanat tab gətirmədi. Kanatın ucu düz Reyçelin üzünə çırpıldı. Anidən sürətlə yıxıldığını anladı. Axır ki, azadlığa çıxmış şar isə okeana tərəf yön almışdı.

İplərə dolaşmış Reyçel və Tolland isə aşağıya tərəf uçdular. Reyçel qarşılarında ikinci ağ təpəciyi görən kimi özünü topladı. Bu təpənin zirvəsini təzəcə keçmişdilər ki, onun digər tərəfinə düşdülər. Xoşbəxtlikdən kostyumları sayəsində zərbə bir qədər zəif alındı. Dünya əl, ayaq, buz toruna çevrilmişdi. Reyçel yamac boyu sürətlə üzüaşağı, buz dağlarının arasına çəkildiyini hiss edirdi. O, növbəti təpə ilə görüşü bir qədər ləngitmək üçün qeyri-iradi əllərini və ayaqlarını yana tərəf açdı. Hərəkət hiss olunmayacaq qədər zəiflədi. Və artıq bir neçə saniyədən sonra Tollandla birlikdə yamacla üzüyuxarı uçurdular. Lap zirvədə isə yenə havaya qalxdılar. Və həmin an Reyçel vahimə içərisində anladı ki, onların dağ yamacıyla okeanla həmsərhəd olan yaylaya doğru final, ölüm enişləri başlayır... Milna buzlağının son səkkiz yüz futu.

Onlar uçuruma doğru şütüyürdülər. Həmin an Reyçel onlara bağlı olan Korkinin hərəkəti ləngitdiyini hiss etdi. Sürətin azaldığını hiss edirdi. Lakin bu "əngəl" bir qədər gecikmişdi. Uçurum get-gedə yaxınlaşırdı. Reyçel əlacsızlıqdan bağırdı.

Buz səth arxada qaldı. Reyçelin yadında qalan axırıncı şey yıxılmağı oldu.

Uetsburq yaşayış kompleksi şimal-şərq rayonunda N-strit 2201-də yerləşir. Buranın sakinləri Vaşinqtonun azsaylı, tam dəqiq ünvanlarından birində yaşadıqları ilə öyünə bilərdilər.

Qebriel fırlanan qızılı qapıdan ildırım kimi gözəl, lakin çox səs-küylü şəlalə ilə bəzədilmiş mərmər holla daxil oldu.

Kontorun arxasından boylanan portye Qebrieli gördükdə heyrətini gizlədə bilmədi:

- Miss Eş? Bu gün bizi ziyarət edəcəyinizi bilmirdim.

-Mən gecikmişəm. - Qebriel tələsik qeydiyyat kitabını imzaladı. Divardakı saat 18:22 göstərirdi.

Portye özünü itirdi:

- Senator mənə siyahı verib, amma sizin adınız orada...

- Siyasətçilər həmişə onlara hamıdan çox kömək edənləri unudurlar.

Qız gülə-gülə liftə tərəf addımladı. Portye tərəddüd içində çabalayırdı.

- Yaxşı olardı ki, mən zəng edərdim...

- Minnətdaram, - Qebriel liftə daxil olaraq düyməni basdı.

Senatorun telefonları söndürdüyünü o hamıdan yaxşı bilirdi.

İkinci mərtəbədə liftdən çıxdı və zərif döşənmiş dəhliz boyu addımladı. Dəhlizin lap sonunda Sekstonun şəxsi təhlükəsizlik agenti - nəhəng cangüdəni görünürdü. Görünür, nəhəng darıxırdı. Qebriel onun burada olmasına təəccübləndi. Cangüdənin təəccübü daha betər idi. Qebrieli görən kimi yerindən sıçradı.

- Mən hər şeyi bilirəm, - dəhlizin tam ortasında qız dilləndi. - Bu gün senatorun şəxsi axşamı var. Heç kimin onu narahat etməsini istəmir.

Cangüdən təsdiq etdi:

- O, qəti surətdə tapşırıb ki, heç bir ziyarətçi...

- Təcili məsələdir.

Cangüdən kürəyini qapıya söykədi.

- Onun şəxsi görüşü var.

- Doğrudan? - Qebriel qırmızı zərfi çıxardı. Cangüdənin gözləri önündə yelləyərək Ağ evin möhürünü göstərdi. -Mən elə indicə Oval kabinetdən gəlirəm. Təcili bu informasiyanı senatora çatdırmalıyam. Ona görə də içəridəki dostları bir neçə dəqiqələrini ev sahibi olmadan keçirəcəklər. İndisə çəkilin, görüm!

Ağ Evin möhürünü görən cangüdən tərəddüd etdi. Qebriel "Zərfin içindəkilərdən xəbəri olmasa, yaxşıdır!" deyə düşündü.

- Sənədlər qalsın, - cangüdən təklif etdi, -mən çatdıraram.

- Xeyr! Mən Ağ Evdən bunları şəxsən onun özünə çatdırmaq haqqında əmr almışam. Əgər mən indi, təcili senatorla görüşməsəm, ola bilər ki, siz sabah özünüzə iş axtarmalı olasınız. Aydındır?

Cangüdənin üzünün ifadəsi kəskin şəkildə dəyişdi. Qebriel başa düşdü ki, senatoru heç bir halda narahat etmək olmaz. Elə buna görə də başqa yollara əl atmağa məcbur oldu. Zərfi cangüdənin sifətinə çırparaq pıçıltı ilə Vaşinqtonun bütün təhlükəsizlik xidmətinin çəkindiyi altı kəlməni işlətdi:

- Siz sadəcə vəziyyətin mahiyyətini başa düşmürsünüz.

Siyasi xadimlərin cangüdənləri heç vaxt vəziyyətin mahiyyətini anlamırlar və bu da onları həddən artıq qıcıqlandırır. Onlar həmişə küt müdafiə aləti rolunu oynayır, daim məlumatsız halda seçim qarşısında qalırdılar: ya qəti şəkildə əmrə riayət edir, ya da növbəti böhranın incəliklərinə vararaq işlərini riskə atırdılar.

Cangüdən dərindən köks ötürdü. Diqqətlə Ağ Evin zərfinə baxdı.

- Yaxşı, mən senatora deyərəm ki, siz içəri buraxılmağınızı qəti şəkildə tələb etmisiniz.

O, qapını açdı. Qebriel sadiq cangüdən fikrini dəyişməmiş tələsdi. Mənzilə daxil olaraq arxasınca sakitcə qapını bağladı.

Girəcəkdə qonaq otağından gələn kişi səsləri eşidilirdi. Bu axşamkı görüş Qebrielin senatorun maşında dinlədiyi yalnız bir telefon danışığının nəticəsi deyildi.

Dənliz boyu qonaq otağına tərəf irəliləyərkən qız qapısı açıq şkafın yanından keçdi. Yun, tvid materialdan olan bahalı altı palto asılmışdı. Şkafın yanında döşəmə üzərində sahiblərinin maddi durumundan xəbər verən bir neçə çanta vardı. İşgüzarlıq dəhlizdə unudulmuşdu. Qebriel, təbii ki, çantaların yanından keçdi. Lakin onlardan biri qızın diqqətini cəlb etdi. Balaca lövhəcikdə şirkətin loqotipi həkk edilmişdi. Al qırmızı raket.

Qebriel ayaq saxladı, sonra isə dizləri üstə çökərək yazını oxudu.

Lövhəcikdə "Speys Amerika, ink." yazılmışdı.

Qebrieli maraq bürüdü, digər çantalara da baxdı.

"Biel aerospeys", "Mikrokosm, ink.", "Roteri roket kompani", "Kistler aerospeys".

Marcori Tençin qətiyyətli səsi qulaqlarında cingildədi: "Sekstonun özəl aerokosmik şirkətlərdən rüşvət aldığından xəbəriniz varmı?"

Qebriel qaranlıq dənlizin sonundakı gur işıqlı qonaq otağına tərəf baxdı.Ürəyi narahatlıqla çırpındı. O, danışmalı, hansısa formada burada olduğunu bildirməlidir. Lakin astaca irəli addımladı. Sakitcə qapıya yaxınlaşdı və girişin bir neçə addımlığında, qaranlıqda ayaq saxladı....Otaqdakı söhbətə diqqətlə qulaq asmağa başladı.

(Ardı var)

DEN BRAUN

Tərcümə edən: ÜLVİYYƏ

Elm.- 2012.- 30 avqust.- S.15.