Birinci beynəlxalq xarakterli "Şuşa qrantı" müsabiqəsinin nəticələri elan edilmişdir

Sentyabrın 21-də "Muğam klub"da Azərbaycan Respublikasının Prezidenti yanında Elmin İnkişafı Fondunun (EİF) birinci beynəlxalq xarakterli "Şuşa qrantı" müsabiqəsinin nəticələri ilə bağlı tədbir keçirilmişdir. Tədbirdə müsabiqənin nəticələri və qalib layihələrin adları açıqlanmışdır.

Fondun icraçı direktoru Elçin Babayev bildirmişdir ki, Qarabağ, onun simvolu olan Şuşa ilə bağlı elmi tədqiqatları stimullaşdırmaq və beynəlxalq səviyyədə araşdırmaları təmin etmək məqsədilə EİF 2012-ci ildə "Şuşa qrantı"nı təsis etmişdir.

Qeyd olunmuşdur ki, azərbaycançılıq ideologiyası prioritetinə uyğun olaraq, bütövlükdə Qarabağın tarixinin, bu diyarın qədim və rəngarəng qeyri-maddi və maddi-mədəni irsinin, mədəniyyət tarixinin, incəsənət sahələrinin və s. kompleks şəkildə, elmi əsaslarla, dərindən tədqiq olunmasının dəstəklənməsi məqsədilə elmi-tədqiqat proqramları və xüsusi layihələr üzrə 2012-ci il üçün birinci beynəlxalq xarakterli "Şuşa qrantı" məqsədli müsabiqəsi bu il mayın 8-də "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin mərkəzi ofisində keçirilən mətbuat konfransında elan edilmişdir.

Müsabiqə ilə bağlı müvafiq məlumat EİF-in internet səhifəsində və kütləvi informasiya vasitələrində işıqlandırılmışdır.

E.Babayev demişdir ki, layihələrin qəbulu mayın 10-dan iyunun 29-dək keçirilmişdir. Həmin müddətdə müsabiqəyə daxil olmuş 9 layihə ekspertiza mərhələlərindən keçmiş, 5 qalib layihə müəyyənləşdirilmişdir. Onlardan ikisi beynəlxalq layihələrdir.

"Şuşa qrantı" müsabiqəsi EİF tərəfindən mütəmadi keçiriləcəkdir.

Tədbirdə Şuşa Rayon İcra Hakimiyyətinin başçısı, "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin sədri Bayram Səfərov müsabiqənin əhəmiyyətini qeyd etmişdir.

Bildirilmişdir ki, müsabiqənin adının seçilməsinin, həmçinin layihə haqqında elanın göstərilən tarixdə və adıçəkilən məkanda verilməsinin xüsusi rəmzi mənası vardır. İyirmi il əvvəl məhz mayın 8-də Ermənistanın silahlı qüvvələri tərəfindən işğal olunmuş Şuşa Azərbaycanın ən qədim yaşayış məskənlərindən biri, nadir memarlıq nümunələrinin toplandığı şəhər-qala, Qarabağın tacı, mədəniyyət beşiyidir. Qəhrəmanlar, sərkərdələr, ədiblər, şairlər, bəstəkarlar, xanəndələr və alimlər yetirmiş Qarabağın zəngin və şanlı tarixi vardır.

Sonra birinci "Şuşa qrantı" müsabiqənin nəticələri və qalib layihələrin adları elan edilmişdir.

Qalib layihələrin rəhbərləri çıxış edərək həyata keçiriləcək layihələr barəsində məlumat vermişlər.

Elm.- 2012.- 10 oktyabr.- S.5.