Yeni arxeoloji materiallar aşkar edilmişdir

Gədəbəy

AMEA Arxeologiya və Etnoqrafiya İnstitutunun ekspedisiyası tərəfindən Gədəbəyin Cəfərli kəndinin yaxınlığındakı Leşkər qalasında arxeoloji tədqiqatlar zamanı son tunc və erkən dəmir dövrünə aid arxeoloji maddi mədəniyyət nümunələri aşkar edilmişdir.

Xocalı-Gədəbəy mədəniyyətinin ən qiymətli abidələrinə aid olan siklopik tikililərin 3.500 - 4 min il yaşı olduğu bildirilir. Arxeoloji qazıntılar nəticəsində tapılan divar qalıqları, məişət nümunələri o dövrdə ərazidə sənətkarlığın, xüsusən dulusçuluq və toxuculuğun inkişaf etdiyini sübuta yetirir.

Daşkəsən

Azərbaycan Milli Elmlər Akademiyasının Arxeologiya və Etnoqrafiya İnstitutunun arxeoloji ekspedisiyası tərəfindən Daşkəsən rayonunda aparılan tədqiqatlar başa çatmışdır.

Ekspedisiyanın rəhbəri, tarix üzrə fəlsəfə doktoru Bəxtiyar Cəlilov AzərTAc-a bildirmişdir ki, rayonun Xoşbulaq kəndi ərazisindəki tunc dövrü və ilk dəmir dövrünə aid kurqanda aparılan arxeoloji qazıntılarda ilk dəmir dövrünə aid muncuqlar, saxsı qablar və digər maddi mədəniyyət nümunələri tapılmışdır.

AzərTAc

Elm.- 2012.- 21 sentyabr.- S.11.