GÖRKƏMLİ ALİMİN 79 YAŞI TAMAM OLMUŞDUR

Fevralın 25-i Azərbaycan Milli Elmlər Akademiyasının prezidenti səlahiyyətlərini icra edən, Geologiya İnstitutunun direktoru, görkəmli alim, akademik Akif Əlizadənin 79 yaşı tamam olmuşdur.

A.Əlizadə 1934-cü ildə Bakıda anadan olmuşdur. O, gənc yaşlarında elmlər namizədi, 35 yaşında isə doktorluq dissertasiyasını müdafiə etmişdir. Həmin dövrdə A.Əlizadə SSRİ-də ən gənc yüksək ixtisaslı mütəxəssislərdən biri sayılırdı. Alim 1978-ci ildə Geologiya İnstitutunun direktoru vəzifəsinə təyin olunmuşdur. O, 1980-ci ildə akademiyanın müxbir üzvü, 1989-cu ildə isə həqiqi üzvü seçilmişdir.

A.Əlizadə 1960-cı ildən Ümumittifaq Paleontologiya Cəmiyyətinin üzvü, Qafqaz Regional Stratiqrafiya Komissiyasının sədri, SSRİ EA Biosfer problemləri üzrə elmi şuranın üzvüdür. Akademik 2007-ci ildə AMEA-nın vitse-prezidenti vəzifəsinə təyin olunmuşdur. Bu il fevralın 21-də isə Rəyasət Heyətinin qərarı ilə AMEA-nın prezidenti səlahiyyətlərinin icrası A.Əlizadəyə həvalə edilmişdir.

Akademik 1970-ci ildə «Fədakar əməyə görə» medalı, 1986-cı ildə isə «Şərəf ordeni», 2004-cü ildə Azərbaycan Respublikasının «Şöhrət», 2008-ci «Şərəf» ordenləri ilə təltif olunmuşdur. Azərbaycan Respublikasının Əməkdar Elm Xadimi və Azərbaycan Respublikasının Dövlət Mükafatı Laureatıdır.

Azərbaycan Milli Elmlər Akademiyası və respublika elm ictimaiyyətinin çoxsaylı üzvləri akademiki 79 yaşının tamam olması münasibəti ilə təbrik edir.

Elm.- 2013.- 27 fevral.- S.3.