Almaniya alimləri Milli Azərbaycan Ədəbiyyatı Muzeyində olmuşlar

Görkəmli alman ziyalısı, Azərbaycanın yaxın dostu, Osvald von Volkenştayn Gesselşaft Cəmiyyətinin prezidenti, Vürsburq Universitetinin professoru Ziqlinda Hartman 8 mart - Beynəlxalq Qadınlar Günündə Azərbaycan xalqının mədəni və maddi dəyərlərini qoruyub saxlayan, zəngin ədəbiyyatımızı dünyaya tanıdan AMEA Nizami Gəncəvi adına Milli Azərbaycan Ədəbiyyatı Muzeyində olmuşdur.

Muzeyi ikinci dəfə ziyarət edən qonaq özü ilə daha bir alman ziyalısını da gətirmişdi.

Qonaqları salamlayan AMEA Milli Azərbaycan Ədəbiyyatı Muzeyinin direktoru, AMEA-nın müxbir üzvü, professor Rafael Hüseynov muzeyin ədəbiyyatımızın təbliğində böyük rol oynadığını bildirmişdir.

Muzeyin ilk dəhlizində görkəmli Şərq və Qərb klassiklərinin barelyefləri sırasında Azərbaycan heykəltəraşları tərəfindən hazırlanmış obraz - dahi alman şairi İohan Volfqanq Getenin Nizami Gəncəvi haqqında fikirlərini dinləyən qonaqlar keçirdikləri qürur hissini gizlətməmiş və muzeydə alman şairinə göstərilən ehtirama görə minnətdarlıqlarını ifadə etmişlər.

Muzeyin yenidən qurulmuş, müasir dünya standartlarına cavab verən geniş, işıqlı zallarını ziyarət edən almaniyalı qonaqlar xalqımızın nə qədər zəngin mədəniyyətə malik olduğunun bir daha şahidi olmuşlar.

Muzeyin "Kitabi Dədə Qorqud" dastanına həsr olunmuş zalında qonaqlara ilk dəfə bu dastanı üzə çıxaran alman alimi Fon Dits, XII yüzilin görkəmli şairəsi Məhsəti Gəncəvi yaradıcılığının tədqiqatçısı Frits Mayer, alman alimi Barbara Fleminqin Həsənoğlu qəzəlini aşkara çıxarması, "Gəncəli müdrik" Mirzə Şəfi Vazehin alman şərqşünası Fridrix Bodenşdedtlə dostluğu haqqında ətraflı məlumat verilmişdir.

Azərbaycanın hazırda dünya arenasındakı nüfuzundan, mədəniyyət sahəsindəki nailiyyətlərindən söz açan Ziqlinda Hartman Avropa oxucusuna Şah İsmayıl Xətainin bir şair kimi daha geniş miqyasda tanıdılmasının, Azərbaycan ədəbiyyatı nümunələrinin Avropa dillərinə tərcüməsi istiqamətində daha çox işlərin görülməsinin zəruriliyini bildirmişdir.

Sonda Z.Hartman muzeyin "Rəy kitabında" təəssüratlarını qeyd etmişdir.

Qonaqlara muzeyin nəşr etdirdiyi yeni kitablar hədiyyə olunmuşdur.

Sevinc PAŞAYEVA

Elm.- 2013.- 15 mart.- S.5.