AMEA Milli Azərbaycan Tarixi Muzeyinin nəşrlərinin təqdimatı keçirilmişdir

Bu yaxınlarda AMEA Milli Azərbaycan Tarixi Muzeyində 2010-2012-ci illərdə muzey tərəfindən nəşr olunmuş kitabları geniş ictimaiyyətə təqdim etmək məqsədilə təqdimat keçirilmişdir.

Təqdimat mərasimində elmi-tədqiqat institutları və ali təhsil ocaqlarının rəhbərləri, müəllim və tələbələri, respublikanın aparıcı kitabxanalarının əməkdaşları, kitab satışı mərkəzlərinin nümayəndələri, kitabsevərlər, KİV nümayəndələri iştirak etmişlər.

Təqdimatdan əvvəl tədbir iştirakçıları muzeyin konfrans salonunda muzeyin nəşrlərilə tanış olmuşlar. Azərbaycan tarixinin aktual məsələlərinə, muzeydə qorunan eksponatlara həsr olunmuş nəşrlər sırasında "Milli Azərbaycan Tarixi Muzeyi kolleksiyasının inciləri" kataloq-albomu, "Hacı Zeynalabdin Tağıyev" albomu, "Azərbaycanın antropomorf terrakotları", "Şirvanın bədii metalı", "Mirzə Fətəli Axundzadə - 200", "Xurşidbanu Natəvan - 180", "Azərbaycanın müdafiə silahları" kataloqları, "Z.Tağıyevin qız məktəbi tarixindən", "Azərbaycanın Paris sülh konfransındakı elçiləri", "Azərbaycan xanlıqlarının bayraqları", "Biz birlikdə qalib gəldik!", "Azərbaycan xalqının mənəvi həyatı" kitabları, "Qarabağın tarixi-mədəni irsi", "Qafqaz Albaniyasının epiqrafik abidələri", "Azərbaycanın maddi və mənəvi mədəniyyətində zərdüştlük dövrünün kaşıları" adlı bukletlər, müxtəlif beynəlxalq konfransların tezis və məruzələri, muzeyin məqalələr toplusu xüsusi yer tutur.

Tədbiri giriş sözü ilə açan muzeyin direktoru, AMEA-nın vitse-prezidenti, akademik Nailə Vəlixanlı nəşrlərin əhəmiyyətindən danışmışdır. Bildirmişdir ki, tədbirin əsas məqsədi ötən üç il ərzində muzey tərəfindən nəşr olunmuş kitabları geniş ictimaiyyətə təqdim etmək, muzeylərdə qorunan maddi mədəniyyət nümunələrindən bəhs edən elmi və elmi-populyar ədəbiyyatın nəşrinin vacibliyini diqqətə çatdırmaqdır. Təqdimata muzey tərəfindən 20-dən artıq kitab, kataloq, broşür və buklet daxil edilmişdir.

Sonra "Milli Azərbaycan Tarixi Muzeyinin nəşrləri (2010-2012)" adlı slayd-film nümayiş etdirilmişdir. Akademik Nailə Vəlixanlı "Muzeyin inciləri", "Muzeyin bələdçisi" , "The Great Silk Way" kitabları haqqında məlumat vermişdir.

Elmi işlər üzrə direktor müavini Nərgiz Əliyeva Muzey tərəfindən hər il nəşr olunan məqalələr toplusu barədə məlumat verərək, topluda yalnız Azərbaycanın deyil, xarici tədqiqatçıların da materiallarının nəşr olunmasını vurğulamışdır.

Muzeyin elmi katibi Fərhad Cabbarov Muzey tərəfindən nəfis tərtibatda nəşr olunmuş "H.Z.Tağıyev albomu", "H.Z.Tağıyev Qız məktəbi" adlı kitablar barədə danışmışdır. Muzeyin baş mühafizi Məhfuzə Zeynalova Muzeyin bərpa laboratoriyasının işini əks etdirən "Muzey eksponatlarının ikinci həyatı-2" bukleti barədə məlumat vermişdir. Bundan başqa, Ekspozisiya şöbəsinin əməkdaşı Məmməd Məmmədov, Arxeologiya Fondunun müdiri Nasir Quluzadə, Silahlar və Bayraqlar Fondunun müdiri Sevinc Vahabova, Xarici əlaqələr şöbəsinin əməkdaşı Pərvin Gözəlov, Ekspozisiya şöbəsinin əməkdaşı Fikrət Bağırov, AMEA Rəyasət Heyətinin şöbə müdiri Zemfira Hacıyeva muzey tərəfindən nəşr olunmuş kitablar, bukletlər, kataloqlar haqqında məlumat vermişlər.

Akademik Z.M.Bünyadov adına Şərqşünaslıq İnstitutunun direktoru, filologiya elmləri doktoru, professor Gövhər Baxşəliyeva çıxış edərək Milli Azərbaycan Tarixi Muzeyinin fəaliyyətinin genişlənməsində muzeyin direktoru Nailə Vəlixanlının xidmətlərini xüsusi qeyd etmiş, bu kimi tədbirlərin AMEA-nın fəaliyyəti barədə geniş ictimaiyyətə məlumat verilməsi baxımından olduqca əhəmiyyətli olmasını vurğulamışdır. Azərbaycan Milli Kitabxanasının direktoru Kərim Tahirov qeyd etmişdir ki, milli kitabxanaya soydaşlarımızla bərabər minlərlə xarici vətəndaş müraciət edir və Azərbaycanla bağlı ədəbiyyat sifariş verirlər. Bu baxımdan Muzeyin nəşrlərinin yalnız Azərbaycan dilində deyil, xarici dillərdə də olması vətənimizin tarixi və mədəniyyəti haqqında əcnəbilərin məlumatlandırılması baxımından olduqca əhəmiyyətlidir. Tədbirin sonunda Muzeylə bir sıra kitabxana, kitab evi və kitab satış mərkəzləri arasında Muzeyin nəşrlərinin yayılması barədə müqavilələr imzalanmışdır.

Elm.- 2013.- 15 mart.- S.5.