Elimizin və elmimizin AĞSAQQALI

Akademik, elimizin və elmimizin ağsaqqalı Cəlal Əliyev mənim üçün çox doğma və əziz bir insandır. XX əsrdə gəncliyini və cavanlığını, XXI əsrdə ağsaqqallığını və müdrikliyini yaşayan böyük alim çoxları kimi mənə də həmişə əziz olub. Onun keçdiyi həyat yolu çətinliklərlə, mübarizələrlə, elmi mətləblərlə dolu olub. Ömrünü mənalı yaşayıb. O, həmişə zəhmətkeş olub. Zəhmətə Allah kimi səcdə edib. Torpağın, təbiətin, sünbülün, zəminin, dənin, tarlanın dilini bilən bir alim kimi Azərbaycan elmi üçün çox işlər görüb. Nə iş görübsə, xalq üçün, millət üçün, dövlət üçün görüb. Onu böyüdən, boya-başa çatdıran ailə Azərbaycana böyük insanlar bəxş edib. Akademik Həsən Əliyevi hamı hörmətlə xatırlayır. Ulu öndərimiz, ümummilli liderimiz Heydər Əliyevin fəaliyyəti hamı üçün örnək olduğu kimi, akademik Cəlal Əliyev üçün də örnək olub.

Ömrün-günün çətin və sınaqlı yollarında Cəlal müəllim şax yeriyən, şux duran, aydın danışan, sözü üzə deyən, həqiqətin tərəfində dayanan əsl kişi - şəxsiyyət ömrü yaşayıb, bu gün də öz təmiz və müqəddəs yolu ilə gedir. Böyük alim, gözəl insan, dostuna dost, düşmənə düşmən olan Cəlal müəllimə yaxın olmaq mənə də nəsib olub. Mənim onunla ilk tanışlığım 1994-cü ildə olub. İlk tanışlıqdan bu günə qədər ona olan sevgim həmişə artıb, həmişə çoxalıb. Ona görə ki, o, bu sevgiyə layiq olub. Xoşbəxtlikdən onunla mənim doğmalığım Milli Məclisdən başlayıb. Onun çıxışları, təklifləri həmişə həqiqətə söykənib. Bizim çox söhbətlərimiz olub. Əsas söhbətlərimiz ulu öndərimiz Heydər Əliyevlə bağlı olub. Dövlətdən, dövlətçilikdən, müstəqillikdən, istiqlaldan, xalqın taleyindən, bu yolda gördüyü çətinliklərdən danışmışıq.

O adamlar yaddaşlarda qalır ki, onlar xalqa çörək verir, ruzi verir, qismət verir. Cəlal müəllim bir alim - vətəndaş, insan kimi də xalqı qarşısında həmişə məsuliyyətli olub. Xalqın böyüklüyünü, arzularını, istəklərini vaxtında dərk edib və tutduğu yol ona çox-çox ölkələrdə böyük şöhrət qazandırıb. Onun taleyinə neçə-neçə Akademiyanın üzvü olmaq, yüksək səviyyəli alimlər yetişdirmək, elmin ağsaqqalına çevrilmək xoşbəxtliyi düşüb. Onun ən yaxın dostu torpaqdır. O, torpağa arxalanıb, torpaq da ona dünya şöhrəti qazandırıb. Azərbaycan torpağının hər yerini qarış-qarış gəzən, görən, bilən, tanıyan bir alim kimi o, torpağımızın şöhrətini zirvələrə qaldırıb. Nur saçmaq, işıqlı olmaq, xeyirxah və alicənab olmaq, insanlara gərək olmaq - Budur insanın böyüklüyü!

Alın təri, əl qabarı, yuxusuz gecələr hələ şərt deyil, intellektual səviyyə və ağılla ürəyin vəhdətindən yaranan vətəndaşlıq hissi olmalıdır ki, alim kimi boy göstərib bu xalqa oğul olasan. Cəlal müəllim buğdanın, bərəkətin, çörəyin, halal nemətin, tükənməz gözəlliyin alimidir. Onun elmi işlərində mücərrədlik yoxdur, konkret olaraq halal nemət var, halallıq və zəhmət var, tükənməzlik var.

Cəlal müəllim kimi ağsaqqalı, elm fədaisini, dövlət adamını, ictimai-siyasi xadimi, istedadlı adamların dostunu qorumaq lazımdır. Çünki belə alimlər həmişə yetişmir. Onu qorumaq xalqı, milləti, vətəni, torpağı, bərəkəti qorumaqdır. İstiqlalı, müstəqilliyi, tərəqqini, yüksəlişi, əmin-amanlığı qorumaqdır.

Cəlal müəllimin bu vaxta qədər gördüyü işlər elimizin və elmimizin sərvətinə çevrilib. Arzu edirəm ki, bundan sonra da Cəlal müəllim heç vaxt yorulmasın. Həmişəki kimi cavanlıq eşqi ilə yazsın, yaratsın, biz də onun elminin və şəxsiyyətinin işığında yaşayaq. Ulu Tanrı Cəlal müəllimə cansağlığı qismət eləsin. Onun sağlığı hamımıza lazımdır. Çox hörmətli və əziz dostumuza yeni-yeni uğurlar arzulayıram!

Zəlimxan YAQUB,

Xalq şairi

Elm.- 2013.- 30 may.- S.13.