Çox hörmətli Cəlal müəllim!

Mən Sizi, Azərbaycan elminin ağsaqqalını ad gününüz münasibəti ilə ürəkdən təbrik edir, Sizə uzun və sağlam ömür, elmi fəaliyyətinizdə yeni-yeni uğurlar arzulayıram. İnanıram ki, Siz bundan sonra da Azərbaycanda biologiya və aqrar elmlərin düzgün istiqamətlənməsində və intensiv inkişafında oynadığınız rolu uğurla davam etdirəcəksiniz.

Həmçinin icazə verin, bu fürsətdən istifadə edərək, rəhbərlik etdiyiniz şöbədə Hesablama struktur biologiyası laboratoriyasının təsis olunmasına imkan yaratdığınız üçün Sizə öz minnətdarlığımı bildirim.

Ümid edirəm ki, Sizin Azərbaycanda başladığınız elmi istiqamətlərdən birini - riyaziyyatın müasir biologiya problemlərinə tətbiqini bu laboratoriyadan istifadə etməklə daha səmərəli şəkildə davam etdirə biləcəyik. Sizi əmin edirəm ki, Azərbaycanda müvafiq sahələrdə dünya səviyyəli alim və mütəxəssislərin hazırlanması, yüksək standartlara uyğun elmi-tədqiqatların aparılması üçün əlimdən gələni edəcəm.

Əminəm ki, qarşıdakı illərdə Sizin rəhbərliyinizlə Azərbaycan elmini dünya səviyyəsinə çatdırmaq və tanıtmaq üçün daha çox iş görə biləcəyik və bunun üçün hər zamankı kimi Sizin dəstəyiniz və tövsiyələriniz bizim üçün çox gərəkli olacaq.

Dərin hörmət və ən xoş arzularla,

Qərib MÜRŞÜDOV

Kembric Universiteti Molekulyar biologiya laboratoriyasının Kompüter kristalloqrafiyası qrupunun

Elm.- 2013.- 30 may.- S.31.