Professor Məryəm Seyidbəyli təltif edilib

Tarix elmləri doktoru, professor Məryəm Həsən qızı Seyidbəyli uzun illər diaspor sahəsində mühüm elmi araşdırmalar aparmış, Azərbaycan elminin ölkəmizdə və dünyada populyarlaşdırılmasında müstəsna xidmətlər göstərmişdir. O, xüsusilə Azərbaycanın elmi diasporu və Azərbaycan elminin tarixinin öyrənilməsi sahələri üzrə mühüm tədqiqatları ilə tanınmaqdadır.

Məryəm Seyidbəyli bu sahədə xeyli kitab ərsəyə gətirmiş və eyni zamanda mütəxəssislər yetişdirmişdir. Azərbaycan elminin inkişafında göstərdiyi əvəzsiz xidmətlərə görə müxtəlif dərəcəli milli və beynəlxalq mükafatlarla təltif edilmiş, dövlət tərəfindən yüksək təltiflərə layiq görülmüşdür.

O, 2010-cu ildə Rusiyada beynəlxalq nüfuzlu “Azərbaycan diasporu: formalaşma və inkişaf xüsusiyyətləri və tendensiyaları” kitabına görə Beynəlxalq Elmlər Akademiyaları Assosiasiyasının diplomuna, 2011-ci ildə isə həmin kitabına görə “Humay” milli mükafatına layiq görülmüşdür. 2012-ci ildə “Azərbaycan diasporu: Ensiklopedik məlumatlar toplusu” kitabına görə diplomla təltif edilmişdir. 2022-ci ildə “Azərbaycan mühacirəti tarixində Şuşanın görkəmli şəxsiyyətləri” kitabı Azərbaycan Respublikasının Diasporla İş üzrə Dövlət Komitəsi tərəfindən yüksək qiymətləndirilmiş və 30 dekabr 2024-cü ildə Məryəm Seyidbəyli “Diaspor fəaliyyətində xidmətə görə” Azərbaycan Respublikasının medalı ilə təltif edilmişdir.

Elm .- 2025.- 10 yanvar(№1).- S.8.