Ulu öndər Heydər Əliyevin ölkəyə rəhbərliyinin 40 illiyi qeyd edildi

AMEA-nın Fəlsəfə, Sosiologiya və Hüquq İnstitutunda (FSHİ) ulu öndər Heydər Əliyevin ölkəyə rəhbərliyinin 40 illiyi münasibətilə dəyirmi masa keçirildi.

Tədbiri giriş sözü ilə institutun direktoru, fəl.e.d. İ.Məmmədzadə açaraq görkəmli ictimai xadim, müasir Azərbaycan dövlətinin qurucusu Heydər Əliyevin xalqımızın taleyində müstəsna rol oynadığını, onu müstəqilliyə qovuşdurduğunu, mütərəqqi tarixi ənənə əsasında milli dövlətçilik konsepsiyasını irəli sürdüyünü, respublikaya rəhbərliyi dövründə milli inkişaf yolunu elmi əsaslarla müəyyənləşdirdiyini, Azərbaycanın ağır günlərində onu fəlakətdən xilas etmək üçün misilsiz fədakarlıq göstərdiyini bildirdi.

Dəyirmi masada iştirak edən institutun aparıcı alimləri - h.e.d. B.Zahidov, fəl.e.d. R.Əzimova, fəl.e.d. E.Zamanova, fəl.e.d., Ə.Tağıyev, fəl.e.d. A.Mustafayev, h.e.d. İ.Vəliyev və başqaları Azərbaycan xalqının müstəqillik qazanması və tarixi dövlətçilik ənənələrinin qorunub saxlanılmasında ulu öndər Heydər Əliyevin misilsiz xidmətlər göstərdiyini, dövlət siyasətini həyata keçirərkən milli ideologiyanın vacibliyinə yüksək önəm verdiyini qeyd etdilər. Çıxışlarda bildirildi ki, ümummilli lider ölkəni təhdid edən vətəndaş müharibəsinin, qardaş qırğınının qarşısını aldı. Xilas yolunu xalqın milli birliyində, vətəndaş həmrəyliyinə nail olmaqda gördü və bu istiqamətdə uğurlu tədbirlər həyata keçirdi. Çıxış edənlər bütün bu ağır məqamlarda ulu öndərin xalqın gücünə arxalandığını, millətin ona sonsuz inamına bel bağladığını xüsusi vurğuladılar.

Dəyirmi masa iştirakçıları ümummilli lider Heydər Əliyev tərəfindən əsası qoyulmuş və bu gün Prezident İlham Əliyevin uğurla davam etdirdiyi inkişaf strategiyasının öz bəhrələrini verdiyini qeyd etdilər.

S.G.ƏLİYEVA

Elm.-2009.-15 iyul.-S.4.