AMEA Rəyasət heyətində dünya şöhrətli alim Lütfi Zadə ilə görüş keçirilmişdir

Görkəmli alim Lütfi Zadəyə AMEA-nın xarici üzvü diplomu təqdim edilmişdir

Noyabrın 10-da Azərbaycan Milli Elmlər Akademiyasının (AMEA) Rəyasət Heyətində ABŞ-da yaşayan həmvətənimiz, dünya şöhrətli riyaziyyatçı alim, qeyri-səlis məntiq nəzəriyyəsi ilə dünya elminə mühüm töhfələr vermiş, NATO və NASA-nın aparıcı mütəxəssisi, ABŞ-ın Berkli Universitetinin ömürlük professoru Lütfi Zadə ilə görüş keçirilmişdir.

43 illik ayrılıqdan sonra ilk dəfə olaraq doğma Vətənə təşrif buyurmuş dünya şöhrətli azərbaycanlı alim əvvəlcə Azərbaycanın elm xadimləri ilə birgə Fəxri Xiyabana gələrək ümummilli lider Heydər Əliyevin və görkəmli oftalmoloq, akademik Zərifə Əliyevanın məzarı önünə əklil və gül dəstələri qoydu.

AMEA-nın həqiqi və müxbir üzvlərinin, Milli Məclisin deputatlarının, respublikanın elmi ictimaiyyəti və KİV nümayəndələrinin iştirak etdiyi tədbiri Azərbaycan Respublikasının rabitə və informasiya texnologiyaları naziri, akademik Əli Abbasov açaraq ilk növbədə Parisdə, YUNESKO-nun iqamətgahında XX əsr Azərbaycan ədəbiyyatının görkəmli nümayəndəsi, alim, pedaqoq Mir Cəlal Paşayevin 100 illiyinə həsr olunmuş mərasimdə iştirak edən və bu səbəbdən tədbirdə iştirak edə bilməyən AMEA-nın prezidenti, akademik Mahmud Kərimovun salamlarını görkəmli alim Lütfi Zadəyə çatdırdı. "Bakutel-2008" XIV Azərbaycan beynəlxalq telekommunikasiya və informasiya texnologiyaları sərgisində iştirak etmək üçün ölkəmizdə səfərə dəvəti qəbul etdiyinə görə görkəmli alimə təşəkkürünü bildirən akademik Ə.Abbasov Lütfi Zadənin həyat yolu və elmi yaradıcılığı haqqında məlumat verdi: "Dünya şöhrətli alim 1921-ci ildə Bakıda anadan olmuş, 16 nömrəli məktəbdə təhsil almışdır. On yaşında Tehrana köçən Lütfı Zadə burada orta təhsilini başa vurduqdan sonra universitetə daxil olaraq, bakalavr diplomu almışdır. Sonradan Amerika Birləşmiş Ştatlarına köçərək, burada magistr təhsili almış, əvvəlcə Massaçusets Texnoloji İnstitutunda, sonra Kolumbiya Universitetində, 1959-cu ildə isə Kaliforniyanın Berkli Universitetində elmi fəaliyyətlə məşğul olmuşdur. Elmdə inqilab etmiş 6 elmi nəzəriyyənin, o cümlədən məşhur qeyri-səlis məntiq nəzəriyyəsinin banisi, onlarca universitet və akademiyanın fəxri doktoru, Berkli Universitetinin ömürlük professoru Lütfı Zadə 43 ildən sonra Bakıya gəlmişdir".

Sonra AMEA-nın Fizika-Riyaziyyat və Texnika Elmləri Bölməsinin akademik-katibi, akademik Akif Hacıyev AMEA-nın xarici üzvü diplomunu professor Lütfı Zadəyə təqdim etdi. Akademik A.Hacıyev bildirdi ki, Lütfi Zadə bu ada elmin inkişafındakı misilsiz xidmətlərinə görə 2001 -ci ildə layiq görülmüşdür. Lakin ötən dövrdə alimin Bakıya səfəri mümkün olmadığına görə diplom indi təqdim edilir.

Mərasimdə çıxış edən Lütfi Zadə ilk növbədə ona göstərilən böyük diqqətə və ehtirama görə Azərbaycan hökumətinə və elm xadimlərinə təşəkkürünü bildirdi. Görkəmli alim Azərbaycan xalqı ilə fəxr etdiyini və qürur duyduğunu vurğuladı. O, ölkənin sosial-iqtisadi, mədəni sahələrində aparılan məqsədyönlü işlər nəticəsində Azərbaycanın milli tərəqqiyə nail olmasının, müstəqil respublikamızın beynəlxalq aləmdə mövqeyinin daha da möhkəmlənməsinin Azərbaycan Respublikasının Prezidenti cənab İlham Əliyevin yürütdüyü uğurlu daxili və xarici siyasətin nəticəsi olduğunu qeyd etdi. Azərbaycanın onun təsəvvür etmədiyi dərəcədə dəyişdiyini, Bakının dünyanın ən gözəl şəhərlərindən biri olduğunu bildirdi. Alim Azərbaycan alimlərinin son illər dünyanın bir sıra elm müəssisələrindəki uğurlarından da söhbət açdı, elmimizin dünyaya inteqrasiyasının təqdirəlayiq olduğunu diqqətə çatdırdı.

Vətəndə olmaqdan məmnunluq duyan alim Azərbaycanda bu illər ərzində əldə olunan uğurlara görə ölkə rəhbərliyinə, doğma xalqına minnətdarlıq etdi. "Mən Bakıdan çıxanda on yaşım var idi. Axırıncı dəfə uzun illər bundan əvvəl - 1965-ci ildə Bakıda olmuşam. İndi mənə öz hisslərimi Vətəndə ifadə etmək çox çətindir. Yaxın dostlarım arasında olmaqdan, bu səmimi münasibətdən çox məmnunam. Azərbaycanda indi baş verənlər məndə müsbət təəssüratlar oyadır. Elmə və mədəniyyətə böyük diqqət yetirilir. Azərbaycan irəliyə gedir və onun parlaq gələcəyi olacaqdır. Bakı dəyişilib, daha da gözəlləşib, yeni binalar tikilibdir. Mən bu uğurlara görə dostlarıma, Azərbaycan xalqına, Prezident İlham Əliyevə minnətdarlığımı bildirirəm, buna görə onları təbrik edirəm. Əminliklə bildirmək istəyirəm ki, bizi irəlidə parlaq gələcək gözləyir".

Görkəmli alim dünya elmində görünməmiş yeniliklərə yol açmış elmi ixtiralarının şərhi ilə bağlı məlumat verdi, məruzə ilə çıxış etdi.

Sonra akademik İsmayıl İbrahimov dahi alimin Bakıya 1965-ci ildəki səfəri haqqında xatirələrini danışdı.

Tədbirdə dünya şöhrətli alimin AMEA tərəfindən Nobel mükafatına namizədliyinin irəli sürülməsi barədə təklif alqışlarla qarşılandı.

Görüşün sonunda professor Lütfı Zadə tədbir iştirakçılarının çoxsaylı suallarını cavablandırdı.

Elm.- 2008.- 17 noyabr.- S.4.