Azərbaycan-Belarus elmi əlaqələri uğurla inkişaf edir

Bu günlərdə Belarus Respublikasının ölkəmizdəki fövqəladə və səlahiyyətli səfıri cənab Nikqiay Paskeviçdən Azərbaycan Milli Elmlər Akademiyasının prezidenti, akademik Mahmud Kərimovun və birinci vitse-prezident, akademik Arif Həşimovun ünvanına məktub daxil olmuşdur. Məktublarda 11-13 noyabr 2008-ci il tarixində ölkəmizdə elmi səfərdə olmuş Belarus Milli Elmlər Akademiyasının (BMEA) nümayəndələri Birləşmiş İnformatika Problemləri İnstitutu (BİPİ) direktorunun müavini, texnika elmləri doktoru S.V.Medvedyev və BMEA Milli İnformasiya Resursları və Texnologiyaları Mərkəzinin şöbə müdiri Y.VKostyukeviçə yüksək təşkilatçılıq şəraitində göstərilmiş səmimi münasibətə görə AMEA Rəyasət Heyətinin, Fizika İnstitutunun rəhbərliyinə, AMEA Fizika İnstitutunun laboratoriya rəhbəri, professor Tofiq Məmmədova və AMEA Xarici əlaqələr şöbəsinin rəisi Mustafa Bağırova və bütün kollektivə təşəkkür bildirilir.

Məktublarda xüsusilə 13 noyabr 2008-ci tarixində AMEA Fizika İnstitutunda AMEA-nın elmi-tədqiqat İnstitutlarının və Belarusdan gəlmiş qonaqların iştirakı ilə keçirilmiş və hər iki ölkədə informasiya-kommunikasiya texnologiyalarının perspektivinə və ikitərəfli elmi əlaqələrin yeni keyfiyyət mərhələsinə keçməsinə istiqamətlənmiş elmi seminarın təşkilinə görə də minnətdarlıq ifadə olunur. Səfirlik öz növbəsində Azərbaycan MEA ilə Belarus MEA arasında daha sıx elmi-texniki əlaqələrin qurulmasında istənilən köməkliyi göstərməyə hazır olduğunu bildirir.

Məlumat üçün qeyd edək ki, AMEA-nın Fizika İnstitutunda keçirilmiş və Belarusun Azərbaycandakı səfırinin birinci katibi Kirill Kamtşevin, AMEA İnformasiya Texnologiyaları və Kibernetika İnstitutlarının alim və mütəxəssislərinin iştirak etdiyi elmi seminarda Belarus nümayəndə heyətinin "SKİF" superkompyuter texnologiyaları və qrid-texnologiyalarının yaradılması və inkişaf perspektivləri mövzusuna həsr olunmuş elmi məruzələri dinlənilmişdir

AMEA-nın birinci vitse-prezidenti, institutun direktoru, akademik Arif Həşimov ilk növbədə qonaqları salamlayaraq, hər iki dövlət arasında müxtəlif sahələrdə, o cümlədən elmi sahədə ikitərəfli münasibətlərin davamlı inkişafının əhəmiyyətindən söhbət açmışdır. Alim Azərbaycan və Belarus Milli Elmlər akademiyaları arasında elmi-texniki sahədə mövcud olan əməkdaşlıq əlaqələrinin uğurla inkişaf etdiyini qeyd edərək, bu münasibətlərin daha da genişlənəcəyinə əminliyini ifadə etmişdir.

Sonra t.e.d. S.Medvedyev "İttifaq dövlətlərinin iştirakçı dövlətlərində multiprosessorlu hesablama sistemləri bazasında elmi tutumlu kompyuter texnologiyalarının inkişafı və tətbiqi" elmi-texniki proqramının həyata keçirilməsi çərçivəsində görülən işlərdən, SKİF proqramının başlıca məqsədlərindən, institutun qarşısına qoyulan konkret vəzifələrdən danışmış, Belarus dövləti ilə digər dövlətlərin elmi qurumlarının şəbəkələri vasitəsilə informasiya mübadiləsinin aparılması üçün yüksək sürətli əlaqə xətlərinin idarə edilməsi qovşağının layihələndirilməsi və yaradılması məsələlərinə toxunmuşdur. S.Medvedyev, həmçinin, Belarusda qrid-infrastrukturunun yaradılması istiqamətində görülən işlər haqqında da məlumat vermişdir. Alim BMEA BİPİ-də "Kollektiv istifadə üçün Respublika Superkompyuter Mərkəzi"nin yaradıldığını bildirərək, azərbaycanlı həmkarlarını bu mərkəzlə tanış etmək üçün Belarus MEA-ya dəvət etmişdir.

Elm və texnikanın son nailiyyətlərinin nümayiş olunduğu "Bakutel-2008" 14-cü Azərbaycan Beynəlxalq telekommunikasiya və informasiya texnologiyaları sərgisinin əhəmiyyətindən danışan Y.Kostyukeviç Azərbaycanda ənənəvi xarakter daşıyan sərginin yüksək səviyyədə təşkil olunduğunu, ölkədə İKT sahəsində nəzərəçarpacaq nailiyyətlərin əldə olunduğunu bildirmişdir.

Mürəkkəb hesablamalar və böyük həcmli yaddaş tələb edən məlumatları daha sürətlə emal edib istifadəçilərə çatdırmaq üçün yüksək hesablama məhsuldarlığına və böyük yaddaşa malik olan, məhsuldarlığı saniyədə on milyardlardan trilyonadək əməliyyatlarla ölçülən superkompyuterlərin əhəmiyyəti və zəruriliyindən danışan natiq superkompyuter mərkəzlərinin yaradılmasının əsas funksiyası və inkişaf tendensiyasından söhbət açmışdır. O, həmçinin, Belarus MEA-nın BASNET elmi-informasiya şəbəkəsinin inkişaf mərhələləri və üstünlükləri haqqında danışmışdır.

Sonda Azərbaycan MEA-nın Fizika İnstitutu ilə Belarus MEA-nın Birləşmiş İnformatika Problemləri İnstitutu arasında əməkdaşlıq haqqında Niyyət Protokolu imzalanmışdır.

Elm.- 2008.- 28 noyabr.- S.16.