Qubada 16 mindən çox insan qətlə yetirilib

Mart qurbanları Qubada da anıldı

Dünən Parlament Jurnalistlər Birliyinin (PJB) təşəbbüsü və təşkilatçılığı ilə Azərbaycanda fəaliyyət göstərən bir qrup xarici və yerli KİV nümayəndələri 31 Mart - Azərbaycanlıların soyqırımı günü münasibətilə Qubadakı soyqırım məzarlığını ziyarət ediblər.

Qeyd edək ki, dünən Quba məzarlığına bu rayonun icra başçısı Rauf Həbibov, deputat Vahid Əhmədov, Quba ictimaiyyəti və paytaxtdan gedən bir çox şəxslər də baş çəkiblər. Daha sonra 31 Mart soyqırım qurbanlarının anma mərasimi Quba şəhərindəki Soyqırım abidəsi önündə davam etdirilib.

Quba Rayon İcra Hakimiyyətinin başçısı Rauf Həbibov bildirib ki, 1918-ci il mart-aprel aylarında ermənilərin Azərbaycan xalqına qarşı apardığı soyqırım aktı Qubadan da yan keçməyib. Onun sözlərinə görə, erməni daşnakları təkcə bu rayonda ümumilikdə 16 min dinc əhalini vəhşicəsinə qətlə yetirib, 122 kənd və 26 məktəb yandırılıb. "XIX əsrdə Azərbaycan Gülüstan və Türkmənçay müqavilələri ilə Rusiya və İran arasında bölünüb. Məhz həmin vaxtlardan Qarabağda yerləşdirilən ermənilər sonradan Azərbaycan türklərinə qarşı vəhşiliklərə başlayıblar. "Böyük Ermənistan" yaratmaq xülyasında ruhlanan erməni qəsbkarları 1905-1907-ci illərdə azərbaycanlılara qarşı geniş açıq şəkildə geniş miqyaslı qanlı aksiyalar həyata keçiriblər. 1918-ci ildə azərbaycanlıların soyqırımı Bakı, Şamaxı, Qarabağ, Zəngəzur, Naxçıvan Lənkəran və başqa bölgələrdə olduğu kimi Quba qəzasında da xüsusi qəddarlıqla həyata keçirilib".

Qubadan seçilən deputat Vahid Əhmədov isə bildirib ki, 1918-ci ildə Stepan Şaumyanın Bakı Sovetinə rəhbərliyi altında Azərbaycanın bir sıra bölgələrində həyata keçirilən soyqırım hadisələri sovet dövründə erməni-müsəlman davası kimi qələmə verilib. Bunun heç vaxt soyqırım kimi nəzərə alınmadığını deyən deputat yalnız 1998-ci ildə Azərbaycan prezidentinin fərmanı əsasında 31 mart azərbaycanlıların soyqırımı kimi qeyd edilməyə başlandığını bildirib. V.Əhmədov qeyd edib ki, 1918-ci il soyqırımı nəticəsində 50 mindən artıq Azərbaycan türkü və digər millətlərin nümayəndələri qətlə yetirilib: "Qubada məhv edilən insanların sayı bəlkə də 16 mindən çoxdur. Çünki son vaxtlar Qubada yeni məzarlıq aşkar edilib və həmin məzarlıqda hətta uşaqların, qadınların qətlə yetirilməsi də müəyyən edilib. 31 Mart Azərbaycan cəmiyyəti üçün ən ağır günlərdən biridir. Biz bu ağır günü qeyd etməklə bir daha Azərbayacan xalqının qəti düşməni olan erməni qəsbkarlarının Azərbaycana qarşı torpaq iddiasında olduğunu həmişə yadda saxlamalıyıq".

Mərasimdə çıxış edənlər dünya ictimaiyyətini azərbaycanlıların soyqırımını tanımağa çağırıblar.

Aqil ASLAN

Ekspress.- 2010.- 1 aprel.- S. 5.