II Beynəlxalq Uşaq Rəsm festivalı başa çatdı

"Mən rəssamam" adlı II Bakı Beynəlxalq Uşaq Rəsm Festivalı aprelin 14-də başa çatıb. Gənclər və İdman Nazirliyinin Mədəniyyət və Turizm Nazirliyi və Ailə, Qadın və Uşaq Problemləri Üzrə Dövlət Komitəsinin "Uşaq ili" çərçivəsində birgə təşkil etdiyi II Bakı Beynəlxalq Uşaq Rəsm müsabiqəsinə ölkəmizlə yanaşı dünyanın 17 ölkəsinin - Belarus, Rusiya, Qazaxıstan, Qırğızıstan, İndoneziya, Rumıniya, Latviya, Litva, Misir, Malayziya, Moldova, Gürcüstan, Bəhreyn, Türkiyə, Bolqarıstan, Yunanıstan və Əlcəzairin istedadlı uşaqları iştirak edib. Müsabiqəyə 2500-dən çox rəsm göndərilib. Müsabiqə qalibləri tanınan rəssam və sənətşünaslardan, uşaqlarla işləyən dövlət orqanları və içtimai birliklərin nümayəndələri və müstəqil ekspertlərdən ibarət münsiflər heyəti tərəfindən seçilib. Münsiflər heyətinin qərarı ilə 42 nəfər qalib seçilib. Onlardan 22 nəfər 3 yaş qrupunda rəngkarlıq, qrafika və dekorativ-tətbiqi sənət, 20 nəfər isə xüsusi və həvəsləndirici mükafatlar alıb. 11-14 yaş qrupunda rəngkarlıq nominasiyası üzrə 1-ci yerə Heydər Əlibəyli, 8-10 yaş qrupunda həvəsləndirici mükafata Gülarə Nəbiyeva, 5-7 yaş qrupunda həvəsləndirici mükafata Eylin Barri və Neman Baratoğlu layiq görülüb. Qaliblərə diplom, qiymətli hədiyyələr, onların müəllimlərinə isə xüsusi təşəkkürnamələr təqdim olunub.

Müsabiqəyə təqdim olunan ən maraqlı işlərdən ibarət kataloq dərc olunacaq.

AYXAN

Ekspress.- 2010.- 15 aprel.- S. 14.