Qara Qarayevə həsr olunmuş müsabiqə başladı

 

Dünən Üzeyir Hacıbəyli adına Bakı Musiqi Akademiyasında pianoçuların Qara Qarayev adına I Beynəlxalq elmi-ifaçılıq müsabiqəsi və pianoçuların "Fortepiano Qara Qarayev yaradıcılığında" I Beynəlxalq elmi-ifaçılıq konfransına start verilib. Tədbirlər Bakı Musiqi Akademiyasının 90 və akademiyanın orta ixtisas musiqi məktəb-studiyasının 30 illiyinə həsr olunub.

   Açılış mərasimində çıxış edən BMA-nın rektoru, xalq artisti Fərhad Bədəlbəyli bildirib ki, müsabiqə və konfransın 2010-cu ili Mədəniyyətlərin beynəlxalq yaxınlaşması ili elan edən UNESCO-nun himayəsi altında keçirilməsi ilə əlaqədar olaraq müsabiqənin şərtlərindən biri iştirakçılar tərəfindən Qara Qarayevin əsərləri ilə yanaşı öz ölkələrinin əsərlərini də ifa etmələridir.

   Mərasimində, həmçinin, BMA-nın dosenti Mədinə Tuayevanın ssenarisi əsasında çəkilən "Söz və Musiqi" filmi də nümayiş etdirilib. Film BMA-da işlənib-hazırlanan elmi-ifaçılıq müsabiqəsi və konfransların tarixini əks etdirib.

   Bu irimiqyaslı layihənin müəllifi, Azərbaycanın əməkdar incəsənət xadimi, sənətşünaslıq doktoru, professor Tərlan Seyidov çıxışında vurğulayıb ki, iştirakçılar arasında beynəlxalq müsabiqələrin qaliblərinin və milli mükafatların sahiblərinin olması keçiriləcək müsabiqənin yüksək səviyyəli olmasından xəbər verir: "Müsabiqənin müsbət cəhəti isə ABŞ, Rusiya, Gürcüstan, Türkiyə, Qırğızıstan, Küveyt, Tatarıstan, Özbəkistan və Türkmənistandan olan pianoçular sayəsində Qara Qarayevin fortepiano musiqisinin interpretatorları və tədqiqatçılarının sayının artması olacaq".

   Qeyd edək ki, dekabrın 6-dan 10-a qədər davam edəcək müsabiqə və konfrans Bakı Musiqi Akademiyasının Qara Qarayev adına Böyük zalında və konfrans zalında keçiriləcək. Birinci qrup iştirakçılar üçün 10-16 yaş həddi, ikinci qrup üçün 17-30 yaş həddi müəyyən olunub.

   Qaliblərin elan olunması və mükafatlandırılması isə dekabrın 10-da baş tutacaq.

  

AYXAN

 

Ekspress.- 2010.- 7 dekabr.- S. 14.