Yeni kinomərkəz yaradıldı

"Nova Gorica" artıq bir film də çəkib

Azərbaycanda "Nova Gorica" adlı yeni kino mərkəzi yaradılıb. Bu barədə mərkəzin təsisçisi və direktoru Tahir Əliyev məlumat verib. Onun sözlərinə görə, mərkəzin yaradılmasında məqsəd gənc rejissorların yaradıcılıq imkanlarının reallaşdırılması üçün geniş meydan verməkdir: "Azərbaycanda istedadlı rejissorlar, ssenaristlər kifayət qədərdir. Ancaq onların öz potensiallarından istifadə imkanları təəssüf ki, məhduddur. Kino mərkəzi isə belə istedadlara bu imkanı yaradacaq".

Kino mərkəzinin adına gəlincə, Tahir Əliyev bunu, Sloveniyanın eyniadlı şəhərilə əlaqələndirdi: "Nova Gorica şəhəri mənə çox doğmadır. Bir müddət öncə "Təxəllüsü Mixaylo" adlı sənədli filmim məhz həmin şəhərdə mükafata layiq görüldü. Bu adı da mən həmin şəhərin şərəfinə, bir növ həmin şəhərə minnətdarlıq əlaməti olaraq verdim".

Qeyd edək ki, kino mərkəzin ilk məhsulunun istehsalına - İlham Tumasın "Sərçələrin payı" ssenarisi əsasında eynadlı bədii qısametrajlı filmin çəkilişlərinə artıq başlanılıb. "Nova Gorica" ilə Aran-Qərb bölgəsi və Yevlaxın regional telekanalı "El" televiziyasının birgə layihəsi olan "Sərçələrin payı"nın rejissoru Tahir Əliyev, operatoru Elxan Rüstəmov, prodüseri İqbal Məmmədəliyev, icraçı prodüseri isə Arzu Abdullayevadır. Film yataqxana şəraitində acınacaqlı həyat sürən, həm təhsildə, həm də işində hüquqları tapdalanan bir tələbə jurnalistin həyatından bəhs edir. Hansı ki, hər kəs onun haqqını yediyi üçün, o da əlacsızlıqdan sərçələrin payını yeyir.

Əsas rolda ixtisasca jurnalist olan, həm də bir neçə televiziya tamaşalarında oynamış Ruslan Zeynalov çəkilib. Tragikomediya janrında olan filmin çəkilişləri Yevlax və Mingəçevir şəhərində reallaşıb.

"Nova Gorica" kino mərkəzilə yanaşı, eyni adda www.novafilm.az saytı da yaradılır. Tahir Əliyev saytın fəaliyyətinin Azərbaycan kinematoqrafiyasının təbliğinə yönəlik olacağını bildirib: "Gənc yazarların ssenariləri, jurnalist məqalələri, kino xəbərləri, bir sözlə, kinosevrələrin maraq dairəsini əhatə edəcək yeniliklərlə zənginləşəcək saytımız. Sayt üç dildə -azərbaycan, rus və ingilis dillərində fəaliyyət göstərəcək".

Hazırda saytın hazırlığı üzərində son işlər görülür və yanvar ayının ilk günlərindən etibarən "www.novafilm.az" saytı geniş auditoriyaya təqdim ediləcək.

Ayxan

Ekspress.-2010.-11-13 dekabr.- S.20.