Karikaturaçılarımızın 90-cı mükafatı

Seyran Cəfərli BMT-nin "Mükəmməllik" mükafatına layiq görülüb

Azərbaycanın tanınmış karikaturaçı rəssamı, müxtəlif beynəlxalq müsabiqələrin laureatı Seyran Cəfərli növbəti - sayca 90-cı mükafatını qazanıb. Onun "Həqiqət carçısı" əsəri BMT-nin Ranan Lurie adına Beynəlxalq karikatura müsabiqəsində "Mükəmməllik" mükafatına layiq görülüb.

Qeyd edək ki, siyasi karikatura ustası Ranan Lurienin adına təsis etdiyi bu beynəlxalq karikatura müsabiqəsi BMT-nin təşkilatçılığı hər ilin sonunda keçirilir. Yarışmada müxtəlif yazıçı və rəssamların BMT-nin prinsiplərinin təsviri, siyasi cizgi mükəmməlliyi və ən yüksək standartı təbliğ edən əsərləri dəyərləndirilir. Azərbaycanlı karikaturaçı rəssamın əsəri də münsiflər heyətinin qərarı ilə adıçəkilən mükafatı qazanıb.

Münsiflər heyətinə Nobel mükafatı laureatı Elie Viesel sədrlik edib. Münsiflər arasında BMT-nin Müxbir Assosiasiyasının prezidenti Giampaolo Pioli, Yazıçılar və Rəssamlar Cəmiyyətinin prezidenti Hans Canitschek kimi tanınmış simalar da olub.

S.Cəfərli əsərinə verilən bu böyük dəyərdən hədsiz qürur duyduğunu və bundan sonra da daha əzmlə çalışacağını bildirib.

Ekspress.- 2010.- 21 dekabr.- S.14.