Ermənilər
Azıxı qazırlar
Dağlıq
Qarabağın Hadrut rayonundakı Azıx mağarasında ermənilər
arxeoloji-qazıntı və araşdırma işlərini
davam etdirirlər. Mağarada 1999-cu ildən bəri
qazıntı işləri aparan ekspedisiyanın rəhbəri,
biologiya elmləri doktoru Levon Yepiskoposyanın dediyinə
görə, paleolit dönəmindəki insan məskəni
olan bu mağara çox nadir və qiymətli tarixi abidədir.
"Burada 300 min il əvvəl,
daş dövründə insanlar yaşayıb. Qazıntı
işləri zamanı burada unikal əşyalar və
qalıqlar tapmışıq. Lakin apardığımız
işlər zamanı hər il
qarşılaşdığımız problem maliyyə
çatışmazlığıdır. Dağlıq
Qarabağdakı hakimiyyət arxeoloji işlərimizi maliyyələşdirməyə
boyun olsa da, vədlərinə tam əməl etmir", -
L.Yepiskoposyan bildirib.
Onun sözlərinə
görə, maliyyə problemlərindən dolayı Azıx
mağarasında qazma işləri ildə yalnız bir ay,
yayda aparılır.
Ermənistan Dövlət
Universitetinin professorunun şikayətlərinə rəğmən,
rəsmi İrəvanla bahəm, Xankəndidəki
separatçı rejim bu qazıntı işlərinə
böyük diqqət verirlər.
Azıx mağarasını
"erməniləşdirməyə" çalışan
və oranın ən qədim insan məskənlərindən
biri olmaqla yanaşı, azıxantropu da hayların "əcdadı"
kimi qələmə verməyə çalışan ermənilər
arxeoloji qazma işlərinə İspaniya, Britaniya və
İrlandiyadan da alimləri cəlb ediblər.
"Dünyanın
müxtəlif ölkələrində diasporamız var. Bizə
qazıntı işlərini daha dəqiq aparmağa imkan verəcək
yaxşı, müasir avadanlıq gərəkdir. Habelə,
ekspedisiyanıın nəqliyyat vasitələrinə
ehtiyacı var. Böyük diasporamız üçün belə
xərclərin böyük olduğunu zənn etmirəm. Ermənilər
anlamalıdır ki, Azıx mağarası sırf elmi
baxımdan önəmli məkan deyil. Bura bütün
dünya erməniləri üçün böyük ictimai əhəmiyyətə
malikdir", - L.Yepiskoposyan söyləyib.
Xarici ölkələrdən
Qarabağa gəlmiş alimlərin heç birinin guya maaş
almadığı, yalnız şəxsi təşəbbüs
və könüllülük əsasında işlədiyi
bildirilir.
Halbuki belə deyil.
Qafqaz Milli Arxeolgiya Cəmiyyətləri Birliyinin sədr
müavini Georgi Vayşadze əməkdaşımıza
bildirdi ki, Ermənistan Elmlər Akademiyasının Arxeologiya
İnstitutu və İrəvandakı Dövlət
Universitetinin tarix fakültəsi Dağlıq Qarabağda
arxeoloji-qazıntı işlərininin aparılmasına
gürcü alimləri də dəvət ediblərmiş.
"Azıx
mağarası çox maraqlı yerdir və təbii ki, orada
çalışmaq, qazıntılar aparmaq, paleolit dönəmindən
qalmış əşyaları üzə çıxarmaq istəyərdik.
Lakin Dağlıq Qarabağ indi ermənilərin nəzarətində
olsa da, Azərbaycan ərazisidir. Bizim isə orada
Bakının icazəsi olmadan
çalışmağımız heç yaxşı
olmazdı. Bir anlıq təsəvvür edin ki,
separatçıların müvəqqəti nəzarətində
olan Abxaziya və ya Cənubi Osetiyada kimlərsə arxeoloji
ekspedisiya təşkil edib, azərbaycanlı alimlər də
qazıntı işlərində iştirak edirlər. Təbii
ki, o qazıntılarda tapılanların hamısı abxaz və
osetinlərin "qədim tarixinə, həmin ərazilərin
məhz onlara məxsus olmasına dəlalət edən
faktlar" kimi təqdim olunacaq. Ona görə də ermənilərin
təkliflərinə rədd cavabı verdik", - G.
Vayşadze söylədi.
Onun dediyinə görə,
Azıx mağarasını dünyaya azzərbaycanlı alim,
mərhum Məmmədəli Hüseynov tanıdıb və
buna görə də ermənilərin indi mağaranı
"haylaşdırmaq" cəhdləri gülünc təsir
bağışlayır.
Rusiya Elmlər
Akademiyasının Arxeologiya İnstitutunun klassik arxeologiya
bölməsinin rəhbəri, tarix elmləri doktoru Vladimir
Kuznetsov da bu fikirdədir.
O, Hadrut rayonundakı
Azıx mağarasının paleolit dövründə insan məskəni
olduğunu və azıx adamı - "azıxantrop"un
qalıqlarının da məhz azərbaycanlı alimlər tərəfindən
aşkarlandığını vurğulayıb.
"O
mağarının Azərbaycan ərazisində yerləşməsi
həmin qədim və dünyaca önəmli abidənin kimə
aidliyini birmənalı şəkildə göstərir. Bu
gün ermənilər orada qazıntı işləri
aparırsa, sabah Ermənistandan polyak və ya fin alimlərindən
ibarət dəstə də Azıxa göndərilə bilər.
Belədə, Azıx mağarasının mənsubluğunu dəyişməlidirmi?
Ermənistan Dövlət Universitetinin belə işlərlə
məşğul olduğuna təəssüflənirəm.
Ciddi təsir bağışlamır belə səylər",
- V.Kuznetsov dedi.
Bakı Dövlət
Universitetinin tarix fakültəsinin "Arxeologiya və
etnoqrafiya" kafedrasının müdiri, ötən əsrin
60-cı illərində Azıx mağarasında tədqiqat
aparmış ekspedisiyanın üzvü, tarix elmləri
doktoru Qüdrət İsmayılzadənin dediyinə görə,
dünyada daş dövrünə aid ən qədim
yaşayış məskəni Olduvey dərəsi hesab olunur.
Azıxı yalnız onunla müqayisə eləmək olar.
"Azıx qədim
türk xalqlarının dilində "ayı
sığınacağı" deməkdir. Bu, həqiqətə
uyğun gəlirdi. Çünki bu mağaradan ən çox
ayılar istifadə edirdi. Sonradan mağaradan ayı sümüklərinin
tapılması da bu
versiyanın həqiqət olduğunu sübut elədi. Ayı kəlləsinin
üstündə cızıqlar var idi. Bu da
ilk ibtidai
insanımızın incəsənət ünsürləri hesab edildi. Ayı kəllələri
mağaranın müəyyən bir yerlərində
gizlədilmişdi. Görünür, bu da ilk
insanımızın inancları ilə bağlı idi. Azıx mağarasının
içində hündürlüyü 2
metrə çatan daş
salaktit vardı. Göydən minillərlə
axan damcılardan isə həmin salaktitin üzərinə sanki
buzlar sallanmışdı.
Mağaranın divarlarını külək o
qədər vurmuşdu ki,
divarlar ovuq-ovuq olmuşdu, arı şanısına oxşayırdı.
Ermənilər o zaman
Moskvada çıxan "Priroda"
jurnalında bir məqalə çap etdirdilər ki, guya bu, erməni abidəsidir.
Orda olan "buz heykəl" də guya
erməni xanımıdır. Guya ermənilər
mağarada xüsusi
döyüşkən arılar saxlayıblar. Düşmən
gələndə o arıları səbətdə
aşağı diyirləyirdilər. Belə primitiv
yalanlara əl atırdılar", -
Q.İsmayılzadə bildirib.
Azıx
mağarasında aşkarlanan tapıntıların
hamısının Azərbaycan muzeylərində olduğunu
vurğulayan alimin sözlərinə görə, ermənilərin
Azıx mağarasında qazıntı işləri
aparmasından ciddi narahat olmağa dəyməz: "Azıx
artıq çoxdan bütün dünyada Azərbaycan abidəsi
kimi tanınıb. Ermənilər yüz dəfə qazsalar
da, azərbaycanlıların dünyanın ən qədim millətlərindən
olması faktını artıq dəyişmək
mümkün deyil. Bundan narahat olmaq lazım deyil. Azıx
dünya arxeoloji ədəbiyyatında öz yerini tutub.
Azıx Azərbaycan torpağıdır. Azıxdan sonra
daş dövrünə aid başqa abidələr də
tapılıb. Naxçıvanda qazma düşərgələr,
Buzeil mağarası, Kəlbəcərdə Zar
mağarası... Amma Azığın ən böyük dəyəri
ondadır ki, burada daş dövrünün bütün mərhələləri
aşkar olunub. Azıx bütün vərəqləri yerində
olan kitabdır".
... Ermənilər isə
qazıntı işlərini davam etdirirlər. Hayların
dediklərinə görə, mağarada dəridən
hazırlanmış ayaqqabı qalıqları
aşkarlanıb və bu, guya ermənilərin "dünyada ən
qədim ayaqqabı geymiş insanlar" olmasını
sübut edir.
Humay
Ekspress.- 2010.- 28 iyul.- S. 13.