Afinada Üzeyir gecəsi

 

Musiqimiz yunanları heyran etdi

 

Yunanıstanın paytaxtı Afinada görkəmli Azərbaycan bəstəkarı Üzeyir Hacıbəylinin 125 illik yubileyinə həsr olunmuş konsert təşkil edilib.

Bu barədə APA-ya Üzeyir Hacıbəyli adına Bakı Musiqi Akademiyasının (BMA) rektoru, xalq artisti Fərhad Bədəlbəyli məlumat verib. Azərbaycanın Yunanıstandakı səfirliyinin təşkilatçılığı ilə keçirilən tədbirin yüksək səviyyədə baş tutduğunu qeyd edən xalq artisti konsertdə xüsusi proqramın təqdim olunduğunu bildirib: "Konsertimiz dünyada Berlin Filarmoniyasından sonra ikinci konsert salonu hesab olunan Afina Dövlət Filarmoniyasında baş tutdu. Heç bir ölkədə bu cür gözəl akustikaya malik konsert salonu ilə rastlaşmamışam. Konsertdə Milli Simfonik Orkestrə dirijor Azad Əliyev rəhbərlik edirdi".

Dahi bəstəkarımızın yubiley tədbirində pianoçu Fərhad Bədəlbəyli, solistlər Gülnaz İsmayılova, Səbinə Əsədova bariton Cavid Səmədovun ifasını tamaşaçılar alqışlarla qarşılayıblar. Proqramda Üzeyir Hacıbəyli ilə yanaşı, Qara Qarayev, Fikrət Əmirov, Niyazi, eləcə Fərhad Bədəlbəylinin əsərləri ifa olunub.

Xalq artisti min nəfərlik konsert salonunun bütünlüklə dolu olduğunu diqqətə çatdırıb: "Konsertdən sonra Yunanıstan musiqiçiləri Azərbaycan musiqisinə heyran olduqlarını dilə gətirdilər. Onlar bizə ölkələrinin musiqiçiləri üçün "master-klass"lar vermək təklifi ilə çıxış etdilər. Çox güman ki, növbəti il üçün bu layihə həyata keçiriləcək və biz Yunanıstanda ustad dərsləri keçəcəyik".

F.Bədəlbəyli yubiley konsertindən öncə Yunanıstanın bir çox televiziya kanallarında Azərbaycan musiqiləri ilə bağlı kliplərin yayımlandığını da qeyd edib, məhz bu cür təşkilatçılıq sayəsində tədbirin yüksək səviyyədə baş tutduğunu deyib.

Xalq artisti tədbirin yüksək səviyyədə təşkilində Azərbaycanın Afinadakı səfirliyinin rolunu xüsusi qeyd edib.

 

 

AYXAN

 

Ekspress.- 2010.- 7 oktyabr.- S. 23.