"Kamançanamə"

Azərbaycan və Ermənistan birgə film çəkib

Azərbaycan və Ermənistan birgə film istehsal edib. APA-nın məlumatına görə, film Avropa Birliyinin təşkilatçılığı ilə həyata keçirilən "Dağlıq Qarabağ" münaqişəsinin həlli istiqamətində Avropa əməkdaşlığı" layihəsi əsasında istehsal olunub.

Layihə Böyük Britaniyanın Barışıq təşkilatı tərəfindən maliyyələşdirilir. Azərbaycan və Ermənistanda istehsal olunan "Kamançanamə" filminin əsas qəhrəmanları Azərbaycan tərəfindən xalq artisti Habil Əliyev, Ermənistan tərəfindən tanınmış kaman ifaçısıdır. Filmdə hər iki ölkənin kaman ifaçısı öz məharətlərini göstərir və kamançanın tarixi haqqında məlumat verirlər. Filmin Azərbaycan tərəfindən rejissoru Toğrul Cuvarlı, müəllifi Vüqar Səfərli, Ermənistan tərəfindən isə Levon Kalantardır.

Tədbirdə filmlərin Azərbaycanda nümayişini həyata keçirən Humanitar Tədqiqatlar Cəmiyyətinin əməkdaşı Kərim Kərimli bildirib ki, bu layihə çərçivəsində filmin nümayişinə Gəncə şəhərindən başlanıb. Onun sözlərinə görə, Azərbaycan tərəfindən filmlərin istehsalını "İnternews" həyata keçirir: "Bizim məqsədimiz və fəaliyyətimiz Dağlıq Qarabağ münaqişəsinin ədalətli həllinə istiqamətlənib. Bu məsələnin həlli yolunda hərə öz bacardığı qədər iş görür, biz də bunu bacarırıq. Bu layihə çərçivəsində eyni zamanda Azərbaycan və Ermənistanın ayrı-ayrılıqda filmləri çəkilir. Birgə filmlərin çəkilişlərini isə Ermənistan tərəfi Ermənistanda, Azərbaycan tərəfi Azərbaycanda həyata keçirir".

K.Kərimli qeyd edib ki, hələ ki nümayiş olunmayan "Mənim dostum, mənim düşmənim" Azərbaycan və Ermənistanın birgə filminin də çəkilişləri hər iki ölkə də baş tutub. Layihə çərçivəsində ümumilikdə 17 film istehsal olunub ki, bu filmlərin nümayişi Azərbaycanla yanaşı, Ermənistan və Dağlıq Qarabağda da təşkil olunur.

"İnternews"un əməkdaşı Nailə Babayeva qeyd edib ki, filmlərin çəkilişindən sonra nəticəyə baxılır və ümumi razılıq əsasında xoşagəlməyən məqamlar və faktlar montaj olunur. Layihənin davamında da bir neçə birgə filmin istehsalı planlaşdırılır.

Humanitar Tədqiqatlar Cəmiyyətini nümayiş zamanı tamaşaçıların diqqətinə azərbaycanlı və erməni gənc rejissorların birgə çəkdikləri "Kamança-namə" filmi, eləcə də Dağlıq Qarabağ müharibəsi zamanı hər iki gözünü itirmiş, hazırda Azərbaycan Dillər Universitetində çalışan ingilis dili müəllimi və Dağlıq Qarabağda yaşayan keçmiş döyüşçünün həyatından bəhs edən filmlər təqdim olunub. Filmlərin nümayişindən sonra isə müzakirələr təşkil olunub.

Ekspress.- 2010.- 9-11 oktyabr.- S. 20.