ABŞ-da "Qarabağ" fotosərgisi

 

ABŞ paytaxtının iki sərgi salonunda - "Studio" və "Honfleur" qalereyalarında oktyabrın sonuna qədər "Qarabağ" adlı fotosərgi nümayiş etdirilir

 

Vaşinqtonda fəaliyyət göstərən "Qarabağ" fondu tərəfindən təşkil edilən bu sərgidə Azərbaycanın ən gözəl güşələrinin dünəni bu gününə dair şəkillər əks olunub.

"Studio" incəsənət qalereyasındakı sərgidə Qarabağın qədim memarlıq abidələri, zəngin mədəni irsi, tanınmış xadimləri gündəlik məişət ənənələrini təsvir edən işlərlə yanaşı, Azərbaycanın bu bölgəsində Ermənistanın işğalçı siyasətinin acınacaqlı nəticələrini göstərən fotolar da yerləşdirilib.

Qeyd edək ki, sərginin eksponatları Heydər Əliyev Fondu, Türkiyənin "Zaman" qəzeti, eləcə kökləri Qarabağ bölgəsinə söykənən bir sıra ailələr tərəfindən təqdim edilib.

Fotosərgiyə amerikalı sənətsevərlərin münasibətindən danışan "Qarabağ" Fondunun icraçı direktoru Diana Altman jurnalistlərə bildirib ki, sərginin tamaşaçıları nümayiş etdirilən fotoları böyük maraq həvəslə izləyirlər: "Sərgiyə gələnlər Qarabağın, xüsusilə Şuşanın sivilizasiya beşiyi kimi rolu, ümumiyyətlə, Azərbaycan mədəniyyətinin dünya mədəni irsinə töhfələrini görməkdən təəccüblərini gizlətmirlər".

  

 

AYXAN

 

Ekspress.- 2010.- 20 oktyabr.- S. 14.