İlyas Əfəndiyev Fondu ABŞ-ın "Boeing" şirkəti ilə birgə sosialyönümlü layihə həyata keçirir

İlyas Əfəndiyev Fondu Azərbaycanda dövlət uşaq müəssisələrindən uşaqların ailələrə verilməsi (deinstitusionalizasiya) və alternativ qayğı proqramına müvafiq olaraq "Kimsəsiz və valideyn himayəsindən məhrum olmuş uşaq və yeniyetmələr üçün sosial-hüquqi reabilitasiya mərkəzi"nin layihəsini hazırlayıb və ABŞ-ın "Boeing" şirkəti ilə birgə oktyabrın 1-dən icrasına başlayıb.

Fondun mətbuat xidmətindən verilən məlumata görə, məqsəd kimsəsiz və valideyn himayəsindən məhrum uşaq və yeniyetmələrin hüquqlarının bərpası, cəmiyyətə inteqrasiyası, təhsil, yaşayış yeri, məşğulluq, sağlamlıq, asudə vaxtın təşkili ilə bağlı problemlərin həllinə xidmət edəcək reabilitasiya mərkəzi yaratmaqdır. Bakı və Abşeron yarımadasını əhatə edəcək layihənin müddəti bir ildir. Layihə çərçivəsində ölkənin müxtəlif dövlət və özəl qurumları, kütləvi informasiya vasitələri ilə əməkdaşlıq nəzərdə tutulub.

Layihəyə könüllülərin cəlb olunması və onlar üçün treninqlərin təşkili vacib vəzifələrdən biridir. Layihə çərçivəsində, həmçinin, monitorinq və təbliğat işlərinin aparılması, həssas qrupa dair informasiya bankının yaradılması, ona hüquqi və psixoloji, lazım olarsa, tibbi yardımın göstərilməsi, müxtəlif marafon, aksiya və digər xüsusi tədbirlərin keçirilməsi, istedadlı və əməkqabiliyyətli həssas qrup üzvlərinin məşğulluq problemlərinin həll olunmasına dəstək verilməsi nəzərdə tutulub.

AYXAN

Ekspress.- 2010.- 27 oktyabr.- S. 14.