138-ci teatr mövsümü başladı

Təntənəli açılış mərasimi Sumqayıt Dövlət Musiqili Dram Teatrının qarşısında keçirildi

Dünən Sumqayıt Dövlət Musiqili Dram Teatrının qarşısında Azərbaycan Teatrlarının 138-ci teatr mövsümünün təntənəli açılış mərasimi keçirilib. APA-nın məlumatına görə, açılış mərasimində çıxış edən Sumqayıt Şəhər İcra Hakimiyyətinin başçısı Vaqif Əliyev yeni istifadəyə verilmiş Sumqayıt Dövlət Musiqili Dram Teatrının qarşısına toplanmış qonaqları salamlayıb və Azərbaycan teatrlarını təbrik edib. Başçı Sumqayıt teatrlarındakı yeniliklərdən, eləcə də bu yaxınlarda daha bir teatr binasının istifadəyə veriləcəyindən söz açıb.

Mədəniyyət və turizm naziri Əbülfəs Qarayev də bütün teatr işçilərini bayram münasibəti ilə təbrik edib və onlara yeni mövsümdə yaradıcılıq uğurları arzulayıb. Nazir Azərbaycan Dövlət Akademik Milli Dram Teatrının binasının əsaslı təmirdən sonra istifadəyə veriləcəyini və bundan sonra daha möhtəşəm tamaşaların hazırlanacağını diqqətə çatdırıb.

Ə.Qarayev eləcə də cari il ərzində Azərbaycanda teatrla bağlı bir neçə beynəlxalq tədbir və festivalların keçiriləcəyini, yeni tamaşaların hazırlanacağını və ciddi islahatların aparılacağını qeyd edib. Nazir bütün bunların Azərbaycan teatrının inkişafına zəmin yaradacağını bildirib.

Sonra Azərbaycan Dövlət Teatr Muzeyi və Azərbaycan Milli Kitabxanası tərəfindən hazırlanan, Milli Teatrın 138 illiyinə həsr olunmuş səyyar sərgi və kitab sərgisi Sumqayıt Teatrının qarşısındakı meydanda nümayiş olunub.

Daha sonra tədbirdə Azərbaycanın bütün teatr kollektivlərinin ifasında hazırlanmış səhnəciklər nümayiş etdirilib. Açılış mərasimində xalq artistləri Azər Zeynalov, Faiq Ağayev, müğənni Röyanın ifasında mahnılar səslənib.

Ekspress.- 2010.- 14 sentyabr.- S.14.