"Best model of Azerbaijan -2010" start götürdü

Erkan Özerman: "Builki müsabiqə bir milli mədəniyyət hadisəsi olacaq"

Dünən "Park İNN" otelində Azərbaycanda 10-cu dəfə keçiriləcək "Best model of Azerbaijan -2010" yarışması ilə əlaqədar olaraq mətbuat konfransı keçirilib. Tədbirdə "Best model of the World" müsabiqəsinin prezidenti Erkan Özerman, əməkdar incəsənət xadimi Fəxriyyə Xələfova, Validə Abbasova, Lyubov Qutorova və stilist Anar Ağakişiyev iştirak edib.

Erkan Özerman ilk olaraq vurğulayıb ki, builki müsabiqə "Best model of Azerbaijan"ın Azərbaycanda ilk təşkilatçısı, Bakıda vəfat edən mərhum biznesmen Nahid Kabakçının xatirəsinə ithaf olunur: "Bura Nahid Kabakçının dəvətilə gəlmişdim. İlk iki yarışmanı da Azərbaycanda o təşkil etmişdi. Ümumiyyətlə, Nahid bəy Azərbaycanla Türkiyə arasında tək mədəniyyət deyil, digər sahələrdə də layihələrə imza atıb. Nahid Kabakçı Bakını çox sevirdi. Elə çox sevdiyi Bakıda da ürək tutmasından vəfat etdi. Cənazəsini Türkiyəyə apardıq. Bu il yubiley ili olduğundan, yarışmanı Nahid Kabakçının xatirəsinə ithaf edirik. Düşünürük ki, bununla onun ruhunu da şad etmiş olarıq".

E.Özermanın sözlərinə görə, "Best model of Azerbaijan -2010" digərlərindən fərqlənəcək. Fərq isə indiyədək yarışmanın təşkilində iştirak edən şəxslərin komanda halında bir araya gəlməsində olacaq: "Müsabiqənin əsas təşkilatçılığı Validə Abbasovaya və Anar Ağakişiyevə həvalə olunub. Amma digər şəxslər də - Fəxriyyə Xələfova, Lyubov Qutorova, Aygün Kazımova, Ruhi öz köməyini əsirgəməyəcək. Hamı əl-ələ verib bir komanda şəklində işləyəcək. Builki müsabiqə bir milli mədəniyyət hadisəsi olacaq və əvvəlkilərdən fərqlənəcək".

Fəxriyyə Xələfova da çıxışında "Best model of Azerbaijan-2010"-un maraqlı və fərqli olacağına inandığını qeyd edib: "Bu müsabiqə ilk dəfə keçiriləndə ölkə üçün böyük bir yenilik oldu. Yaxşı nəticələr də qazanıldı. O vaxtdan mən bu yarışmaya dəstək vermişəm. Bu il də elə olacaq. Dəstəyimi əsirgəməyəcəyəm və əlimdən gələn köməyi edəcəyəm. Amma təşkilatçılıq mənim səlahiyyətimdə deyil. Çünki mən həmişə demişəm ki, təşkilati məsələlər olduqca ciddi prosesdir. Onu yalnız bilənə həvalə etmək lazımdır".

Müsabiqənin rəhbəri Validə Abbasova çıxışında qeyd edib ki, vaxt az olduğundan müsabiqənin seçim turuna model agentlikləri tərəfindən təqdim edilən peşəkar modellər cəlb olunacaq. Ancaq özünü sınamaq istəyən gənclərə də şans veriləcək.

"Best model of Azerbaijan -2010" yarışmasının prezidentləri Anar Ağakişiyev və Validə Abbasova bu müsabiqənin yüksək səviyyədə təşkil olunması üçün əllərindən gələni əsirgəməyəcəklərini vurğulayıblar.

Yeri gəlmişkən, bu il "Best model of the World" müsabiqəsi dekabrın 11-də İstanbulda baş tutacaq. Bu barədə "Best model of the World" müsabiqəsinin prezidenti Erkan Özerman jurnalistlərlə söhbətində deyib.

O bildirib ki, müsabiqənin İstanbulda keçirilməsinin səbəbi bu şəhərin 2010-cu ilin Avropa mədəniyyət paytaxtı seçilməsi ilə əlaqədardır.

E.Özermanın sözlərinə görə, hər il olduğu kimi, bu il də müsabiqəyə dünyanın 90 ölkəsinin təmsilçisi qatılacaq. O vaxta qədərsə hər ölkə özünün təmsilçisini müəyyənləşdirəcək. "Best model of Turkey" isə oktyabrın 14-də məlum olacaq.

Qeyd edək ki, bir müddət əvvəl "Best model of Azerbaijan-2010" müsabiqəsinin xalq artisti Aygün Kazımovanın təşkilatçılığı ilə keçiriləcəyi barədə məlumatla yayılmışdı. Xəbəri müğənni özü də təsdiqləmişdi: "Yarışmanın dünya üzrə prezidenti Erkan Özərman qarşısında bəzi şərtlərim var. Qəbul edəcəyi təqdirdə yarışmanın prezidenti mən olacam".

Məsələyə aydınlıq gətirən A.Kazımova qarşıdakı bir sıra layihələrinin həllini düşünərək layihədən imtina etdiyini söyləyib: "Məndə belə bir ideya yaranmışdı ki, builki yarışmanın təşkilatçılığını öz üzərimə götürüm və bunu yaxın dostum olmuş, artıq haqq dünyasına qovuşan Nahid Kabakçıya həsr edim. Amma sonradan gördüm ki, qarşıda planlaşdırdığım layihələrlə həmin yarışma üst-üstə düşür. Mən təşkilatçı olmaq yox, oxumaq istəyirəm. Ona görə də, model yarışmasının prezidentliyi fikrindən daşındım. Amma mənim "Best Model of Azerbaijan -2010"-la əlaqələrim tamamilə kəsilmir. Mən sözügedən model yarışmasının münsiflər heyətinin üzvlərindən biri olaraq seçilmişəm. Yeri gəlmişkən, bu işdə Validə Abbasovaya da öz xeyir-duamı vermişəm".

Aygün Kazımova sonda bildirib ki, tezliklə "Yeni ulduz" mahnı müsabiqəsinin münsiflər kürsüsündə oturacaq.

Bundan başqa o, ATV telekanalında efirə çıxacaq yeni tele-layihələrdən birinə aparıcılıq edəcək.

AYXAN

Ekspress.- 2010.- 17 sentyabr.- S. 14.