"Bir-birimizi
yaxşı tanımalıyıq"
Bakıda Humanitar
Əməkdaşlıq üzrə
I Azərbaycan-Rusiya Forumu açılıb
Dünən Bakıda Humanitar Əməkdaşlıq
üzrə I Azərbaycan-Rusiya Forumu başlayıb. İkigünlük
forumun təntənəli
açılışı Beynəlxalq Muğam Mərkəzində
keçirilib.
Forumda Rusiya tərəfdən
Rusiya Prezident Administrasiyasının rəhbəri Sergey
Narışkin, Rusiya Federasiyasının mədəniyyət
naziri Aleksandr Avdeyev, Rusiya prezidentinin beynəlxalq mədəni
əməkdaşlıq üzrə xüsusi nümayəndəsi
Mixail Şvıdkoy, Rusiya prezidenti protokolunun rəhbəri
Vladimir Şevçenko, MQİMO rektoru Anatoli Torkunov, MDB
işləri üzrə Federal Agentliyin rəhbəri Fərid
Muxametşin, Dövlət Dumasının deputatları, alimlər,
mədəniyyət və incəsənət xadimləri,
Rusiya KİV-lərinin rəhbərləri iştirak edirlər.
Forum çərçivəsində
"İTAR-TASS"ın təqdimatında "Rusiya və
Azərbaycan: Keçmişdən gələcəyə"
adlı foto-sərginin açılışı da nəzərdə
tutulur.
Prezident
Administrasiyasının (PA) rəhbəri Ramiz Mehdiyev tədbirin
məqsədinin iki ölkə arasında humanitar sahədə
əməkdaşlığı daha da dərinləşdirmək
olduğunu deyib.
Forumun nəticəsi
olaraq yeni layihələrin həyata keçirilməsinə
başlanacağına ümid etdiyini bildirən PA rəhbəri
bir neçə gün əvvəl 20 Yanvar hadisələrin
20 illiyinin qeyd olunduğunu xatırladıb, Azərbaycanın ərazi
bütövlüyünün pozulmasına etiraz edən əhaliyə
divan tutulduğunu bildirib: "Bəs nə üçün
Qorbaçov Ermənistanda azərbaycanlılara qarşı vəhşiliklər
törədiləndə, onları öz doğma
yurd-yuvalarından qovanda oraya qoşun yeritmədi? Əfsuslar
olsun ki, həmin vaxt mərkəzi mətbuat susurdu, bəzi
hallarda isə Azərbaycanın ərazi
bütövlüyünün pozulmasını dəstəkləyirdilər".
Azərbaycanla Rusiya
arasında humanitar əməkdaşlığın uğurla
inkişaf etdiyini söyləyən R.Mehdiyev Azərbaycanda rus
dilinə yüksək diqqət ayrıldığını, 16
mindən çox gəncin rus dilində təhsil
aldığını xatırladıb. O, Puşkin, Lermontov,
Yesenin və Bulqakovun əsərlərinin Azərbaycan dilinə
tərcümə olunaraq 1,5 milyon tirajla çap edilməsini
Azərbaycanda rus mədəniyyətinə böyük
marağın sübutu olduğunu qeyd edib.
R.Mehdiyev Azərbaycan-Rusiya
əlaqələrinin dərin tarixi köklərə söykəndiyini,
bu münasibətlərin indi də yüksək səviyyədə
davam etdirildiyini bildirib. O, iki ölkə arasında
bütün sahələr üzrə əlaqələrdə
müsbət inkişaf nəzərə
çarpdığını, əməkdaşlığın
daha da möhkəmlənməsi üçün mühüm
addımlar atıldığını qeyd edib. Bugünkü
tədbirin mühüm əhəmiyyət kəsb etdiyini qeyd
edən natiq yüksək səviyyəli Rusiya nümayəndə
heyətinin burada təmsil olunmasının tədbirə verilən
qiymət olduğunu vurğulayıb. O, bu tədbirin iki
ölkə arasında münasibətlərin inkişafına
öz töhfəsini verəcəyini qeyd edib.
Tədbirdə
çıxış edən Rusiya prezidentinin beynəlxalq mədəni
əməkdaşlıq üzrə xüsusi nümayəndəsi
Mixail Şvıdkoy forumu yaratmaqda məqsədin iki xalqın
ziyalılarının birgə "beynini" yaratmaq
olduğunu deyib: "Məqsədimiz odur ki, forum iki xalq
arasında mövcud tarixi mədəni əlaqələrin
inkişafına xidmət etsin. Bizim xalqlarımız bir-birini
daha yaxşı tanımalı, yaxşı başa
düşməlidirlər".
Azərbaycan və Ermənistan
təmsilçilərinin növbəti görüşlərinin
olub-olmayacağı ilə bağlı APA-nın
sualını cavablandıran Şvıdkoy qeyd edib ki, "Azərbaycan
və Ermənistan ziyalılarının, ictimaiyyət
nümayəndələrinin görüşü və
qarşılıqlı səfərləri bir-birinə
çox etimad edən insanlar arasında təşkil oluna bilər".
Dediyinə görə, Azərbaycanın Rusiyadakı səfiri
Polad Bülbüloğlu, Ermənistanın Rusiyadakı
keçmiş səfiri Armen Smbatyan və o, bir-birlərinə
yüksək səviyyədə etibar edirlər: "Əfsuslar
olsun ki, mən Ermənistanın Rusiyadakı hazırkı səfirini
tanımıram. Odur ki, bu barədə hələlik konkret
fikir söyləmək mümkün deyil".
Forumda həmçinin
Rusiya mədəniyyət naziri Aleksandr Avdeyev, Azərbaycan
Milli Akademiyasının prezidenti Mahmud Kərimov, MDB işləri
üzrə Federal Agentliyin rəhbəri Fərid Muxametşin,
Azərbaycanın mədəniyyət və turizm naziri Əbülfəz
Qarayev və digərləri çıxış ediblər.
Prezident
Administrasiyanın şöbə müdiri Novruz Məmmədov
jurnalistlərə açıqlamasında Azərbaycanla Rusiya
arasında yaxşı əməkdaşlıq münasibətlərinin
olduğunu deyib: "Bu əməkdaşlıq bütün
sahələrdə çox gözəl inkişaf edir. Bu tədbir
"Azərbaycan və Rusiya Humanitar Əməkdaşlıq
Forumu" adlanır. Yəni düşünürük ki, biz
təxminən 200 ilə yaxın bir yerdə olmuşuq. İstər
Rusiyanın tərkibində, istər SSRİ-nin tərkibində.
Ona görə bizim humanitar sahədə əməkdaşlığımız
üçün zəmin var. İki ölkə arasında əməkdaşlığın
daha da inkişaf etdirilməsi üçün bizim ölkənin
rəhbərləri belə bir təkliflə
çıxış ediblər. Bu unikal bir formatdır".
Ekspress.-
2010.- 23-25 yanvar.- S. 4.