Gəlinə bəzək vurun...

 

Xanımlarımız daha çox hansı gəlinliklərə və saç düzümlərinə üstünlük verirlər?

 

Toy günü gözəl görünmək bütün qızların arzusudur. Bu günü unudulmaz etmək üçün gözəl saç düzümü, ecazkar gəlinlik seçmək çox önəmlidir. Amma unutmamalıyıq ki, gəlinlik seçərkən xanımlarımız bədən quruluşunu da nəzərə almalıdırlar.

Modelyer Nərminənin sözlərinə görə, 2011-ci il gəlinlik modelləri həddən artıq müxtəlifdir. Ancaq qızlarımız dəblə ayaqlaşmaqdansa, bədən quruluşlarına görə gəlinlik seçməlidirlər. Əks halda ən dəbli gəlinlik belə xanımı gözəl göstərməz, əksinə toy günündə xanım özünü çox narahat hiss edər. "Bəzi xanımlar var ki, bədən quruluşu dördbucaq formasında olur. Bu tip olan xanımların bel kəsiyi çox bilinmədiyi üçün bellərini üzə çıxara bilən büzməli gəlinlik seçmələrini məsləhət görərdim. Bədən quruluşu armuda bənzəyən xanımlar qalın qumaşdan tikilən vertikal gəlinlik formalarına üstünlük verməlidir. Xatırladım ki, bədən quruluşu armuda bənzəyən xanımların ayaqları çiyinlərindən daha geniş olur. Bud hissəsi geniş və yumru olan xanımlar düz gəlinlik paltarlarından qaçmalıdırlar. Çünki bu tip gəlinliklər budların iriliyini daha çox üzə çıxaracaq. Bel hissəsi qalın olan xanımlar isə V formalı gəlinliklərə üstünlük verməlidirlər. Kəməri olan və geniş formalı gəlinliklər bu xanımlar üçün nəzərdə tutulmayıb. Bədən quruluşu üçbucaq formasında olan xanımların çiyinləri ayaqlarına nisbətən geniş olduğu üçün, çiyinlərinin genişliyini gizlətmək məqsədi ilə düz və uzun qollu gəlinlik seçməlidirlər. İdeal fiquraya sahib olan yəni 90-60-90 olan xanımlara hər formada olan gəlinliklər yaraşır", - deyən modelyer bu xanımların da bellərini nəzərə çarpdıra biləcək gəlinliklərə önəm verməsini məsləhət görür.

Onun sözlərinə görə, düz qarınlı və kiçik sinəsi olan xanımlar düz gəlinlik paltarları seçməlidirlər. "Azərbaycan qadınları qarınlı olurlar, toy günü gəlinlərimiz qarınlarının bilinməməsi üçün A hərfi formasında olan paltarlar geysələr onların bu qüsuru bilinməyəcək. Adətən indi hamı kürəyi açıq gəlinliklərə üstünlük verir. Amma xanımlar nəzərə almalıdırlar ki, əgər kürəkləri gözəldirsə, bu formada gəlinlik seçə bilərlər. Əks halda çirkin kürəyi ortada qoymaq kimə lazımdır?"

Modelyerin fikrincə, balacaboylu xanımlar V formalı gəlinliklərə üstünlük versələr, boyları daha uzun görünər. Hündürboylu xanımlara hər modelin yaraşdığını deyən həmsöhbətim boynu qısa olan xanımlara məsləhət görür ki, toy günü saçlarını toplamaq onların bu qüsurunu gizlədə bilər. Əksinə uzun boyunlu xanımlar isə saçlarını açıq buraxsalar daha gözəl görünərlər.

Bu gün şəhərimizin mağazalarında müxtəlif formalı və müxtəlif qyimətli gəlinliklər tapmaq mümkündür. Gəlin paltarları satıcısı Vüsalənin sözlərinə görə, onların mağazasında kirayəsi 100 manatdan başlayaraq 1500 manata qədər olan gəlinliklər var. Satıcı onu da deyir ki, hazırda mağazada olan bütün gəlinliklər internet yolu ilə sifariş edilərək Bakıya gətirilir.

Paytaxt mağazalarında Türkiyə, İspaniya, Ukrayna, ABŞ-da istehsal olunan gəlinliklərə də rast gəlmək olar. Bu gəlinliklərin formasına və istehsal olunduğu firmalara görə, qiymətləri müxtəlifdir. Satıcı Fərqanənin sözlərinə görə, elə gəlinlik var ki, bahalı daşlarla işlənib. Bu gəlinliyin qiyməti isə nə az, nə çox 4500 manatdır. "Bu gəlinliyi bizə bir xanım sifariş etdirmişdi. İnternet yolu ilə onu İspaniyadan Bakıya gətirtdik. Xanım gəlinliyi nəğd pulla götürdü. Amma toyundan bir müddət sonra paltarı yarı qiymətə bizə satdı. İndi biz həmin gəlinliyi 1300 manata kirayə veririk", - deyən Fərqanənin sözlərinə görə, köhnəlmiş və yaxud da dəbdən düşmüş gəlinliklər daha ucuz qiymətə - 50-100 manata rayonlara satılır.

Hazırda bütün mağazalara gəlinliklərin əksəriyyəti xaricdən gətirilir. Gəlinliklər arasında azərbaycanlı modelyerlərin əl işləri olsa da, satıcılarla söhbət zamanı məlum oldu ki, əksəriyyət xarici ölkələrdən gətirilmiş gəlinliklərə üstünlük verir. Mağazalarda açıq-saçıq gəlinliklərlə yanaşı hicablı-bağlı gəlinliklərə də rast gəlmək mümkündür. Satıcıların sözlərinə görə, istnilən formalı gəlinliyi hicablı gəlinliyə dönüşdürə bilirlər. "Sadəcə, müştəri istəsin, gerisi asandır. Biz müxtəlif aksesuarlarla açıq-saçıq gəlinliyi qapalı, hicablı gəlinliyə çevirə bilirik. Gəlinliklər istifadədən sonra xüsusi dizinfeksiya edici dərmanlarla yuyularaq yenidən istifadəyə verilir".

Xatırladaq ki, kirayə gəlinliklər müştərilərə şəxsiyyət vəsiqəsini girov qoymaqla verilir. Toy günü başa çatdıqdan sonra paltar geri qaytırılır, məbləğ ödənilir.

Satıcıların müştərilərlə bazarlıq etmək şansları da var. Belə ki, Vüsalənin sözlərinə görə, müştəriyə baxıb gəlinliyə qiymət qoyurlar. "Elə müştəri var ki, gəlir özündən razı danışır və biz həmin müştəriyə kirayəsi 200 manat olan paltarı 400-500-ə vermişik. Bəzən də elə müştəri olur ki, adamın ürəyinə yatır, belə müştəriyə 800 manatlıq paltarı 100 manata verdiyimiz vaxtlar da olub. Hər şey müştərinin davranışından aslıdır", - deyən satıcı cırılmış və ləkə düşmüş gəlinlik üçün əlavə cərimənin olduğunu da bildirir.

Saç ustası Fazilə xanım isə 2011-ci ildə gəlin saç düzümlərinin müxtəlifliyindən söz açdı. Onun sözlərinə görə, bu il də xanımlarımız hər il olduğu kimi ilk növbədə üz quruluşlarını nəzərə alaraq saç düzümləri seçə bilərlər. Saç ustası deyir ki, xanımlar yumru sifət üzlərini gizlətmək üçün açıq saç formalarına üstünlük verməlidirlər. "Uzun sifət quruluşuna malik olan xanımlara saç düzümü seçmək o qədər çətin deyil, onlara istənilən saç forması gözəl yaraşır. Amma dolu, yumru sifəti olan xanımlar açıq formalı saç düzümləri seçməlidirlər" - deyən həmsöhbətim onu da qeyd etdi ki, xanımlarımız bəzən özlərinə yaraşmayan saç düzümləri seçirlər. Bu da onların toy günü gözəl görünməsinə problem yaradır. Onun fikrincə, gəlinlərimiz saç düzümü seçməmişdən öncə saç ustası ilə məsləhətləşsələr daha gözəl görünərlər. "Bəzən olur ki, xanımlar mənə elə bir saç düzümü ilə müraciət edirlər ki, çaşıb qalıram. Mənim üçün istənilən saç düzümünü yığmaq problem deyil, amma xanım da özünə, üzünə yaraşan saç düzümü seçməlidir. Bəzən olur ki, həddən artıq uzun boylu xanım, saçlarının hündür yığılması arzusunda olur. Bu saç düzümü xanımı daha uzun göstərəcəyi üçün məsləhət görmürəm. Düzdür, müştərinin istəyi bizim üçün qanundur, amma bəzi elementlər var ki, onu müştəri də nəzərə almalıdır".

Saç ustası bu il üçün dəbdə olan saç rənglərini də açıqladı. Onun sözlərinə görə, dərisi ağ olan xanımlar tünd saç rənglərinə, qara, qəhvəyi tonlara, buğdayı dərisi olan xanımlar bir qədər açıq sarı rəngin tonlarına üstünlük verməlidir. "Yenə qeyd etməliyəm ki, istər saç düzümləri, istərsə də saç rəngləri individual olmalıdır. Bəzən dəblə ayaqlaşmaq istəyən xanımlar özlərini gülünc vəziyyətə qoyurlar. Nəzərə almaq lazımdır ki, hər zaman üçün dəb insanın ona yaraşana üstünlük verməsidir".

 

 

İradə CƏLİLOVA

 

Ekspress.- 2011.- 1 aprel.- S. 8.