Beynəlxalq forumun proqramı açıqlandı
Aprelin 7-9-da Bakıda keçiriləcək mədəniyyətlərarası dialoq üzrə beynəlxalq forumun proqramı bəlli olub. Forum "Sərhədsiz dünyaya doğru" adlı sessiya ilə açılacaq. Sessiyanın açılışında Azərbaycan prezidenti İlham Əliyev, Avropa Şurası Parlament Assambleyasının (AŞPA) prezidenti Mövlud Çavuşoğlu və İSESCO-nun baş direktoru Əbdüləziz bin Osman əl-Tüveycrinin çıxışları nəzərdə tutulub. İlk sessiya sülh və inkişafa nail olmaq məqsədilə mədəniyyətlərarası anlaşma və mədəni müxtəliflik məsələsinə həsr olunacaq.
Sessiyaya Azərbaycanın xarici işlər naziri Elmar Məmmədyarov və BMT-nin Sivilizasiyalar Alyansının strateji inkişaf və tərəfdaşlıq üzrə müşaviri Can Kristof Ba sədrlik edəcəklər. Növbəti sessiya "Daha mənalı dialoqa doğru: mədəniyyət, incəsənət və irs" mövzusuna həsr olunacaq. Sessiyaya Azərbaycanın mədəniyyət və turizm naziri Əbülfəs Qarayevlə Avropa Şurasının Mədəniyyət və Təbii İrs üzrə direktoru Robert Palmer sədrlik edəcək.
Aprelin 8-də keçiriləcək 3-cü sessiya
mədəniyyətlərarası dialoqun aparıcı fiqurları kimi qadınların roluna həsr olunacaq. Sessiyaya Azərbaycanın
birinci xanımı, Heydər Əliyev Fondunun prezidenti Mehriban Əliyeva və UNESCO-nun mədəniyyət
və mədəniyyətlərarası
dialoq şöbəsinin
direktoru Katerina Stenu sədrlik edəcək.
Forumun yekunlarına dair mətbuat konfransı keçiriləcək.
Ekspress.- 2011.- 6 aprel.- S. 23.