Ocaq tarixi fotolarda
"Abşeron" rəsm qalereyasında Asif Ata Ocağı ilə
bağlı sərgi açılıb
Aprelin 21-də (21 Çiçək
33-cü il) İçərişəhərdəki
"Abşeron" rəsm qalereyasında
"Ocaq tarixi fotolarda" adlı fotosərgi
açılıb. Bu haqda
İnam Atanın (Asif
Atanın) Mütləqə
İnam Ocağının
Yükümlüsü
İşıqlı Atalı məlumat verib.
Sərgidə
Ocaqçılar, Ocaq dostları, habelə Azərbaycanın
tanınmış aydınları, elm, sənət xadimləri,
jurnalistlər iştirak ediblər.
Sərgini giriş
sözü ilə açan qalereyanın direktoru Eldəniz
İbrahimov iştirakçıları salamlayıb, Asif Ataya
həsr olunmuş sərgini ictimai önəmli hadisə
saydığını bildirib, Atayla bağlı xatirələrini
dilə gətirib.
Mütləqə İnam
Ocağının Ruhani Başçısı Safruh isə
deyib: "Bu gün biz bənzərsiz ruhani mübariz,
özünü cəmiyyətə qarşı qoymağı
bacaran İnam Atanın Yolunun fotolarda əks olunması ilə
bağlı sərgiyə
yığışmışıq. O cəmiyyət ki,
Atanı yaxına buraxmırdı. Atada bu cəmiyyəti dərindən
bilmək, tanımaq keyfiyyəti vardı".
Ruhani Başçı
Atanın "Azərbaycanımız-Azərbaycanlığımız"
adlı dəyərlər sistemi haqqındakı fikirlərinin
mahiyyətini açıb: "Bura Atanın adına,
eşqinə toplaşmışıq. Ataya səcdə edənlərin
birincisi mənəm. Sonra başqaları gəlib. Bu səcdə
tarixiləşib. Ataya səcdə yeganə hadisədir. Yəni,
səcdə olunan da sənindir, səcdə edən də sənsən.
Azərbaycan tarixində belə bir hadisə olmayıb.
Atanın İrsinə yiyələnməklə Azərbaycanda
yeni fəlsəfə, ədəbiyyat yaranacaq, Mütləqə
İnam Fəlsəfəsi ilə həyata yeni impuls verəcək.
Ataya sarılan Azərbaycanı heç bir ildırım vura
bilməz".
Mütləqə İnam
Ocağının Yükümlüsü
İşıqlı Atalı sərgilənən şəkillər
haqqında danışıb: "Bunlar sadəcə şəkil
deyil, bir xalqın möhtəşəm İnam
yaradıcılığını göstərən
tarixdir".
Fiologiya elmləri doktoru,
professor Nizami Tağısoy Ocağın son dönəmdə
geniş yayıldığını, Ata fikirlərinin
gerçəkləşməsinin canlı şahidi
olmasından fərəhləndiyini ifadə edib: "Zaman
keçəcək, Asif Atanın böyüklüyü daha
yaxşı anlaşılacaq".
Ədəbiyyat və
İncəsənət Arxivinin direktoru, tanınmış ədəbiyyatşünas
Maarif Teymur Ataya, Ocağa sayğılarını ifadə
edib: "Safruhun Ruhani Başçılığı ilə
Atanın ideyaları yurdumuzda və dünyada
yayılır".
Tanınmış
yazıçı-publisist Əlisahib Əroğul da Mütləqə
İnamın yayılmasından fərəhləndiyini ifadə
edib: "Atanın Dünyabaxışının
çağımız və sabahımız üçün
böyük önəmi olacaq, bu inamı gələcək nəsillərə
əvəzsiz töhfə kimi ötürməliyik".
Tanınmış xanəndə
Şahin Babayev Ataya, İnam Evinə sevgisini ifadə edib:
"Ocaq dostu olmağımla fəxr edirəm".
Şairlər Qəşəm
İlqar Ruhdaş, Seyraqib Coculu Ata ilə bağlı xatirələrini
danışıb, Ocaq ruhlu şeirlərini oxuyublar.
Tanınmış rəssam
Vaqif Ucatay sərgidən aldığı təəssüratı
bölüşüb: "Ata məni özümə
tanıtdı."
Yazıçı-publisist
Zaməddin Ziyadoğlu Ocağa sevgisini ifadə edib.
Atanın dönəmində
Ocaqçı olmuş Əsil (Elxan Hüseynov) sərginin təşkili
üçün təşkilatçılara
sayğısını bildirib: "Ata mübarizəsini tək
başlamışdı. Qürurvericidir ki, onun Ocağı
yaşayır və indi çoxlu tərəfdarları
var".
Alim-publisist Baba Əhmədli
Ocaq yönündə yaradıcılığını inamla
davam etdirdiyini söyləyib.
Professor Telman Əliyev
Atanın əvəzsiz idrak yiyəsi olduğunu
vurğulayıb.
Naşir-publisist Hidayət
Musabəyli Ocaqçı olduğu dönəmdə
Atanın, Ocağın qarşılaşdığı təhlükəli
məqamlardan, çətinliklərdən danışıb.
Rafiq Turabxanoğlu sərgidən
aldığı təəssüratı
bölüşüb: "Ata ilə, Ocaqçılarla fəxr
edirəm. Atanın xoşbəxtliyi ondadır ki, sizin kimi
ardıcılarını yetirə bilib. Onun peyğəmbərliyi
bundadır".
Memar Səyavuş
Dadaş Atanın İnamının insani aqibətlər
yaratdığını deyib.
Qeyd edək ki, Azərbaycan
ictimai mühitində imzası tanınanlar - şair,
tarixçi-alim Şahin Fazil, şair Abbas Abdulla,
yazıçı-dramaturq Əmir Pəhləvan,
tarixçi-alim Xəliyəddin Xəlilli, yazıçı
Rafiq Tağı, Fazil Kərimli, Ağşın Ağkəmərli,
Teymur bəy, Ayaz İmranoğlu, Əli Şamil, rəssam
Elnur Rəsulov və başqaları sərgiyə tamaşa
edib, təəssüratlarını bölüşüblər.
Sərgidə iştirak edən
keçmiş Ocaqçılar Ataya, Safruha, İnam Evinə
sevgi və sayğılarını ifadə ediblər.
Safruh sonda tədbir
iştirakçılarına sayğısını bildirib.
Tədbir boyunca xatirə
şəkilləri çəkilib.
Sərgiyə qatılan
onlarla iştirakçı Mütləqə İnam
Ocağının 33 illik dönəmini əks etdirən və
ilk dəfə üzə çıxarılan nadir, tarixi
fotoşəkillərə tamaşa edib. Ocaq quruculuğu
yönündə sərgilənən fotoşəkillər
iştirakçıların böyük marağına səbəb
olub. Sərgidə Ocaqçıların bir qismi öz geyimində
iştirak ediblər.
Sərgi aprelin 24-dək
davam edəcək.
Ekspress.-
2011.- 23-25 aprel.- S.31.