Firəngiz Əlizadənin "Mugflamenko"su "Flamenco Biennale"sini heyrətə saldı

Hollandiyanın paytaxtı Amsterdam şəhərində "Flamenco Biennale" III Beynəlxalq Flamenko Musiqisi Festivalı keçirilib. Yanvarın 21-dən 30-dək davam edən festival çərçivəsində Hollandiyanın məşhur konsert salonlarında dünyanın müxtəlif ölkələrindən gələn tanınmış musiqiçilərin ifasında qədim Əndəlüs musiqisi olan flamenkolar ifa olunub. Bu festivalda Azərbaycan bəstəkarı, Azərbaycan Bəstəkarlar İttifaqının sədri, xalq artisti, professor Firəngiz Əlizadə də təmsil olunub. Onun musiqi tarixində ilk dəfə flamenko ilə muğamın sintezi olan "Mugflamenko" əsərinin premyerası yanvarın 30-da Amsterdamda yeni inşa olunmuş 1200 nəfərlik "Muzikcentrum" Konsert Salonunda baş tutub. Festivalın təşkilat komitəsinin təklifi ilə bəstələnən əsərin tanınmış xanəndə, əməkdar artist Zabit Nəbizadə, tarzən Ələsgər Məmmədov, eləcə də tanınmış dirijor Ed Spanyardın idarə etdiyi Hollandiyanın məşhur "Nieuw Ensemble" kamera orkestri, həmçinin, məşhur flamenko ifaçısı Karlos Moreno Deniya Arturo Ramon tərəfindən harmonik ifası tamaşaçıların sürəkli alqışları ilə müşayiət olunub. Dahi qəzəlxanımız Əliağa Vahidin "Ey gül, sənə qəlbimdə məhəbbət yenə vardır" mətləli qəzəli həm azərbaycan, həm də ispan dilində oxunub. Qəzəl həmçinin tamaşaçılar üçün holland dilinə də tərcümə edilib.

Konsertdən sonra festivalın bədii rəhbəri Ernestino Fon De Noort Firəngiz xanımın yeni əsərini "Flamenco Biennale"nin bəzəyi kimi qiymətləndirərək "Mugflamenko"nun Azərbaycan və Avropa musiqisinin sintezi ənənəsinin ən gözəl nümunəsi olduğunu qeyd edib: "Çox şadam ki, bizim festivala əsər bəstələmək üçün Firəngiz xanımı razı sala bildik. O, bir daha adını mədəniyyətlər dialoqu və müasir musiqi tarixinə qızıl hərflərlə yazdırdı".

Ernestino Fon De Noort, həmçinin, xanəndə Zabit Nəbizadənin, tarzən Ələsgər Məmmədovun ifasına valeh olduğunu qeyd edib.

"Nieuw Ensemble" kamera orkestrinin bədii rəhbəri Coel Bons yerli KİV-ə verdiyi açıqlamalarda bəstəkarın yeni əsərinin premyerasını idarə etməsindən məmnunluq duyduğunu vurğulayıb: "Biz artıq neçə illərdir ki Firəngiz xanımla əməkdaşlıq edirik. Onun məxsusi olaraq "Miraj" kamera orkestri üçün bəstələdiyi əsərlə biz dünyanın müxtəlif ölkələrində çıxışlar etmişik. Bundan başqa Firəngiz xanımın "Atlas" kamera okestri üçün bəstələdiyi "Zikr" əsərinin adını da, qeyd etmək istəyirəm. "Mugflamenko" əsərinin belə rezonans doğuracağına əvvəlcədən əmin idim. Düşünürəm ki, festivalda ifa olunan əsərlərin arasında "Mugflamenko" dinləyicilərin daha çox diqqətini cəlb etdi və zövqünü oxşadı".

Qeyd edək ki, yanvarın 21-dən 30-dək davam edən festival çərçivəsində 27 konsert, onlarla seminar, mühazirələr, master-klaslar keçirilib ki, bu tədbirlərdə 10 minlərlə tamaşaçı iştirak edib.

Məlumat üçün qeyd edək ki, flamenko musiqi və rəqsin bir hissəsi olub, İspaniyanın musiqi mədəniyyəti nümunəsidir. Bu rəqs "flamenko" adlanan Əndəlüs (Sevilya) qaraçılarının rəqsidir. Deyilənə görə, ilk flamenko rəqqasları həvəskar insanlar olublar. İlk dəfə 1774-cü ildə Xose Cadalsonun nəşr etdirdiyi ədəbiyyatda flamenko rəqsinin texnikasından bəhs olunur. İlk dövrlərdə flamenko sadə musiqi alətlərində çalındığı halda, daha sonralar gitara ilə ifa olunub. Flamenkonun qızıl dövrü 1869-1910-cu illər hesab olunur.

İLTİFAT

Ekspress.- 2011.- 3 fevral.- S.23.