Azərbaycanda İran Kino Həftəsi açıldı

İranın Azərbaycandakı səfirliyinin Mədəniyyət Mərkəzinin kino zalında İran Kino Həftəsinin açılış mərasimi keçirilib. APA-nın məlumatına görə, tədbirdə çıxış edən İranın Azərbaycandakı səfirliyinin Mədəniyyət Mərkəzinin sədri İbrahim Nuri İran kinosunun nailiyyətlərindən danışıb. O bildirib ki, il ərzində İranda yüzdən artıq tammetrajlı filmlər və teleseriallar çəkilir.

İranın Azərbaycandakı səfiri Məhəmmədbağır Bəhrami isə deyib ki, Hollivudda çəkilən filmlər bəşəriyyətin zərərinədir: "Hollivud müstəmləkəçilərin fikir və ideyalarını yayır, qeyri-əxlaqi filmlər vasitəsilə zorakılığı və zülmü cəmiyyətlərə təlqin edir. Film vasitəsilə çirkini təmiz, təmizi isə çirkin göstərmək olar. Amma İran və Azərbaycan kinematoqrafçıları hər şeyi olduğu kimi göstərir. Azərbaycan və İran filmləri həqiqətən də təqdirəlayiqdir. Mənim də iştirak etdiyim İran və Azərbaycan prezidentlərinin görüşündə cənab İlham Əliyev iki ölkənin gəncləri üçün müştərək tarixi bir filmin çəkilməsinin zəruri olduğunu bildirdi".

Mərasimdə kinorejissor Ayaz Salayev və digər rejissorlar çıxış edib. Açılış mərasimində rejissor Məcid Məcidinin "Sərçələrin nəğməsi" filmi nümayiş olunub.

Ekspress.- 2011.- 8 fevral.- S. 14.