120 yaşlı bina təmir edildi

İçərişəhərdə yerləşən abidələrdə və tarixi binalarda bərpa və konsevrasiya işləri həyata keçirilir. "İçərişəhər" Dövlət Tarix-Memarlıq Qoruğu İdarəsinin mətbuat xidmətindən verilən məlumata görə, işlər Azərbaycan Nazirlər Kabineti tərəfindən təsdiq edilmiş "Bakının tarixi mərkəzinin konservasiyası üzrə ətraflı Baş Plan"a əsasən Tarix-Memarlıq Qoruğu İdarəsi tərəfindən aparılır. Artıq A.Zeynallı küçəsi, 20-də yerləşən və 1890-cı ildə inşa olunmuş tarixi binada təmir-bərpa işləri başa çatıb. Binanın fasadı qabaqcıl texnologiyaların köməyi ilə bərpa edilərək tarixi görkəmi özünə qaytarılıb və bina möhkəmləndirilib. Binanın daxili yüksək standartlara uyğun olaraq təmir olunub, Heydər Əliyev guşəsi yaradılıb, Toğrul Nərimanbəyov, Elbəy Rzaquliyev, Böyükağa Mirzəzadə kimi məşhur rəssamların İçərişəhəri özündə əks etdirən rəsm əsərləri ilə bəzədilib. Simsiz internetlə təmin olunmuş binada iclas zalı, danışıqlar otağı, işçilərin asudə vaxtlarının keçirilməsi üçün sahə mövcuddur.

Əvvəllər yaşayış binası olmuş daha sonra Azərbərpa Elmi Tədqiqat İnstitutu yerləşən binada Nazirlər Kabinetinin müvafiq qərarına əsasən bərpadan sonra "İçərişəhər" Dövlət Tarix-Memarlıq Qoruğu İdarəsi fəaliyyət göstərməyə başlayıb.

AYXAN

Ekspress.- 2011.- 9 yanvar.- S.14.