Cavidin Ev Muzeyinə yeni eksponatlar verilib

Görkəmli Azərbaycan ədibi Hüseyn Cavidin Naxçıvan şəhərindəki Ev Muzeyi 2010-cu ildə yeni nümunələrlə zənginləşib.

Muzeyin direktoru Bəhruz Axundov bildirib ki, hazırda muzeydə 8200 eksponat mühafizə və nümayiş olunur.

Bu günlərdə isə muzeyə Hüseyn Cavidin bir sıra əsərlərinin yeni nəşrləri təqdim olunub. Ədibin Bakıdakı ev-muzeyinin direktoru, filologiya elmləri doktoru Gülbəniz Babaxanlının nəşr etdirdiyi "Cavidşünaslıq", Yusif Aslanovun "Cavidin söz dünyası", Əbülfəz Naxçıvanlının "Tale burulğanı", Hüseyn İbrahimovun "Səksən" (məqalələr, təbriklər, xatirələr toplusu) kitablarını, Naxçıvan Dövlət Universitetinin "Elmi əsərləri"ni, AMEA-nın Naxçıvan Bölməsinin "Xəbərlər"ini bunlara misal göstərmək olar.

Eyni zamanda, muzeyə təqdim olunan eksponatlar içərisində fotoşəkillər, rəsm əsərləri, portretlər də yer alıb. Bunlardan Azərbaycan Respublikasının əməkdar rəssamı Mircəlil Seyidovun "Şairin yuxusu" təsviri sənət nümunəsini, Arif Hüseynovun "Şeyx Sənan" əsərinə çəkdiyi qrafik illüstrasiyanı, Rafael Qədimovun "Dahilər diyarı" əsərinin fotosurətini göstərmək olar.

AYXAN

Ekspress.- 2011.- 12-14 fevral.- S. 31.